COVID-19 hri kai mi 78 in inenkawlna bill tawh

Mizoram State Health Care Scheme (MSHCS) hnuaiah COVID-19 hri kai ten an inenkawlna senso bill theiin mi 78-in an bill tawh a, Health Care Scheme-a inziaklutte hian damloh vanga an inenkawlna senso cheng nuai 2 thlengin an bill thei a ni.

Mizoram State Health Care Society thawkte sawi danin nikum October atanga kumin March thla inkar chhungin Zoram Medical College (ZMC)-a hri kai enkawl tawh zinga mi 63-te chu Mizoram State Health Care Scheme hnuaiah an inenkawlna senso tumsak an ni a, Serchhip District Hospital-a hri kai enkawl mi 12 leh State pawna inenkawl Covid-19 hri kaite chu MSHCS hnuaiah hian an inenkawlna senso tum sak an ni tawh bawk. COVID-19 hri kai MSHCS hnuaia inziaklutte chuan an inenkawlna senso hi an bill thei a, he Scheme hnuaiah hian inenkawlna senso nuai 2 thlengin bill theih niin, sawrkarin inenkawlna tur a buatsaih hmuna enkawlte chauh a huam a ni.

MSHCS-ah hian kum 2020-21 atan inziaklut chhungkaw 1,13,720 awmin, kum hmasa 2019-20 aiin mi 52,705 (86.38%)-in an tam zawk a. MSHCS atana inziaklut hi kum 2019-20 ah chhungkaw 61,015 awmin kum kal mek 2020-21 ah chuan chhungkaw 1,13,720 an inziaklut a, chung zinga 56,822 chu Aizawl District-a mi an ni a. Inziaklut tlemna ber Mamit District-ah chuan chhungkua 2,230 an inziaklut bawk. District pariat zingah Serchhip District chu inziaklut pun tamna ber a ni a, kum 2019-20 aiin kumin ah 276.17%-in an pung a. Aizawl District-ah kum hmasa nen khaikhinin inziaklut zat punna a tlem ber a, 47.71%-in a pung a ni.