Kum 2021-2022 Academic Session atan School kal phal ala ni rihlo

Mizoram sawrkar-a School Education Department chuan kum 2021-2022 Academic Session atan Class zawng zawng (Pre-Primary atanga pawl XII) te chu hriattirna dang awm hma chu Class kalloh chhunzawm tur a nih thu sawiin, a theih chin chinah Online Class neih phal a ni thung.

School Education Department hian mipuite himna tur leh COVID-19 avanga Lockdown hnuaiah Class neih tan leh dan tur chungchang ah nimin khan thuchhuah siamin Academic Session 2021-2022 thar atana Class zawng zawng, Pre-Primary atanga pawl XII te chu hriattirna dang awm hma chu Class pangngai (normal Class) suspend vek turin an ti a, normal Class khaihlak (suspend) chhungin a theih chin chinah Online Class neihpui phal a ni thung a, hemi atan hian School Admission chu Online system hmangin tih theih a ni ang. School leh zirna In dangte pawhin Online Class neih dan tur atana Prescribed norms chu uluk taka zawm vek tur a ni a, rei tak taka Online Class neihpui leh In lama zir tur tam lutuk pek loh hram hram tur a ni anga. Sawrkarin a duan ang ni lo, Syllabus, Subject emaw lehkhabu dang engmah zir belhpui phal a ni lova, he thupek bawhchhiaa tilui an awm a nih chuan dan anga hrem theih an ni ang.

Hei bakah hian School Education Department thuchhuah chuan SCERT-in a buatsaih ‘4-Week Alternative Academic Calendar for Elementary Schools in Mizoram’ (2020-21) chu Elementary School zawng zawng atan Normal Class suspend chhungin hman tur a nih thu a tarlang a,  MBSE buatsaih ‘Week-Wise Plan for Secondary and Higher Secondary Schools' (2020-21) chu Secondary and Higher Secondary Schools zawng zawng atan normal class suspend chhungin hman tur a nih thu a tarlang bawk.

Hei bakah hian School Hostel zawng zawng thupek dang chhuah hma loh chuan khar vek tur a ni bawk.

School Education Department-in hri leng laka himna tura Standard Operating Procedure (SoP) a siam chu fimkhur leh uluk taka zawm vek tur a nih thu a tarlang bawk.