Latest News

Serchhip-a COVID-19 hri kai phurhna atan bialtu MLA in sum rawn ruahman

Serchhip damdawi In kawt-a Sample lakna leh Rapid Antigen Test hmanga Sample enfiahna chu sawn a ni dawn a, COVID-19 hri kai hmuhchhuah te phurhna turin Motor pakhat ruahman niin bialtu MLA, Lalduhoma chuan hemi atana senso hi a tum dawn a ni.


Nimin khan Serchhip Thalai Pawl (STP) hruaitute chuan Serchhip-a Health Department hotute kawmin Serchhip damdawi In kawt, Morgue House bul kawngpui kam-a Sample lakna leh Rapid Antigen Test neihna hmun chungchang hi an sawipui a, helai hmun hi vantlang kawngpui hnaih leh damlo tam tak kaltlangna hmun a nih avanga harsatna awm thei te sawiho a nih hnuah Health Department building remchang a awm mai loh thu an sawi a, hei vang hian Serchhip Tuikhuah Veng atanga Vengchung panna kawng kam-a awm, ZDU Sub-Hqrs. building chu Sample lakna atan hian dil nghal a ni a, ZDU lamin rem an tih angin nimin khan Medical lama thawktute nen enfiah in Vawiin atang khian Rapid Antigen Test (RAgT) hmanga Sample enfiah hi ZDU building-ah hian kalpui a ni dawn a ni.

Serchhip-a COVID-19 hri kai hmuhchhuah te phurhna chungchanga harsatna pawh Serchhip Thalai Pawl te hian Serchhip bialtu MLA, Lalduhoma hnenah nimin vek khan thlen nghalin bialtu MLA hian hri kai te phurhna leh driver rawihna atana hman turin thla khat atan Rs. 30,000/- a lo ruahman sak nghal a, Serchhip Thalai Pawl te ngenna angin Lalhriathlua, Serchhip Darnam Veng chuan a Motor, Maxi Cab chu hemi atana hman tur hian thawhin amah hian a khalh nghal dawn a, nimin vek khan Medical lama thawktute nen hriat tur pawimawh hrang hrang inhrilhhriatna neih nghal a ni bawk.

Serchhip Thalai Pawl chuan heng an hmalakna hrang hranga rawn penchhuak, Serchhip bialtu MLA te, hri kai te phurhna tura Motor thawhtute leh Sample lakna leh Test neihna atana hmunhma hman tirtu ZDU Serchhip te chungah lawmthu an sawi bawk a ni.

Comments

Chhiar Hlawhte