Mizoram-ah COVID-19 hri kai 35 hmuh belh leh an ni

Niminpiah-a Mizoram-a Sample enfiah atangin COVID-19 hri kai mi 35 zet hmuhchhuah leh an ni a, a tam zawk chu Aizawl khawpui Veng hrang hrang ami te an ni.

Niminpiah khan ZMC Laboratory-ah Sample 1339 enfiah leh niin heng atang hian COVID-19 hri kai mi 16 hmuhchhuah leh niin mipa leh hmeichhia 8 ve ve an ni a, State pawn atanga rawn lut mi pakhat telin a bak zawng hi tualchhunga hri inkaidarh an ni. Aizawl Dinthar Veng-ah hri kai mi 10 hmuhchhuah niin Salem Veng, Kanan Veng, Falkawn, Khatla, Durtlang leh Bethlehem Veng atangin hri kai pakhat theuh hmuh a ni bawk.

Niminpiah vek khan Rapid Antigen Test hmangin Sample 483 enfiah niin hri kai mi 17 hmuhchhuah an ni bawk a, Aizawl Dinthar Veng atang bawk hri kai hmuhchhuah tam berin mi 8 zet hmuhchhuah leh an ni a, Zemabawk Vengthar leh Zarkawt atangin hri kai pahnih ve ve hmuh niin Vaivakawn, Chanmari West, Chanmari leh Chawnpui atangin hhri kai pakhat theuh hmuh niin Sumsuih khua mi pakhat, West Bengal atanga rawn haw chu Lengpui Airport-ah hri a kai tih hmuhchhuah a ni bawk.

Niminpiah khan District hrang hranga TrueNat Laboratory-ah Sample 93 enfiah niin hri kai mi 2 hmuh an ni bawk a, Champhai District leh Saitual District-a hmuh niin State pawn atanga haw an ni thung. Heti hian Mizoram-a COVID-19 hri kai hmuhchhuah tawh zawng zawng chu 2792 an tling ta a, an zinga mi 2374 te chu enkawl dam ni tawhin tunah hian hri kai enkawllai 417 an la awm mek a, nimin khan mi 27 te chu enkawl dam leh an ni bawk.

Hri kai hmuhchhuah tlemin enkawl dam an pung zel :

Darkar 24 kalta chhung khan India ramah COVID-19 hri kai mi 38,310 hmuh belh leh an nih laiin hri kai mi 58,323 te chu enkawl dam an ni thung. Darkar 24 kalta chhung khan India ramah Sample 10,46,247 enfiah niin hri kai 38,310 hmuh an ni a, heng te nen hian India ramah Sample enfiah tawh zawng zawng chu 11,17,89,350 niin hri kai hmuh tawh chu 82,67,623 a ni a, India rama Sample enfiah tawh atangin zaa 7.39 te chuan hri hi an kai a ni.

Darkar 24 kalta chhung khan India ramah hri kai mi 58,323 te chu enkawl dam niin tun thlenga enkawl dam hi 76,03,121 an ni a, hei hi hri kai hmuhchhuah atangin zaa 91.96 niin tunah hian hri kai enkawllai 5,41,405 an awm a, hei hi hri kai hmuhchhuah atangin zaa 6.55 a ni bawk. India rama hri kai hmuhchhuah zingah hian nimin thlengin nunna chan mi 1,23,097 an awm tawh a, hei hi hri kai hmuhchhuah atangin zaa 1.49 a ni bawk a, darkar 24 kalta chhung khan nunna chan mi 490 an awm leh a ni.