Serchhip District-ah Hri kai 98.85% dam tawh

Serchhip District-a COVID-19 hri kai hmuh-chhuah mi pahnih te chu enkawl dam an nih hnuah nimin khan anmahni enkawlna hmun atanga chhuahtir leh an ni a, Serchhip District-a hri kai hmuhchhuah atangin zaa 98.85 te chu enkawl dam an ni tawh.

Serchhip CMO Office atanga thu kan dawn danin nimin-a Serchhip District-a COVID-19 hri kai enkawl dam tak te hi Oct. 24, 2020-a Serchhip District-a hri kai hmuhchhuah te niin mipa leh hmeichhia an ni a, mipa hi Thentlang khua niin Manipur atanga a rawn haw hnua hri kai hmuhchhuah niin Hmeichhia hi Bihar atanga rawn haw niin Serchhip AOC Veng-a khawsa a ni thung a, hri an kai tih hmuhchhuah an nih lai hian sawrkar in inkhunghranna hmun a siam-a an awm lai ve ve niin nimin-a an Sample enfiah a nih hnuah hri lakah fihlimin chhuahtir an ni ta a ni.

Serchhip District-ah hian niminpiah khan TrueNat Laboratory-ah Sample 10 enfiah niin Rapid Antigen Test hmangin Sample 14 enfiah a ni bawk a, heng atang hian hri kai hmuhchhuah thar awm lovin nimin thlenga Serchhip District-a hri kai hmuhchhuah chu mi 87 an la ni a, nimin-a mi 2 enkawl dam nen hian tun thlengin mi 86 enkawl dam ni tawhin hri kai hmuhchhuah atanga zaa 98.85 te chu enkawl dam ni tawhin tunah hian hri kai enkawllai mi pakhat a la awm a. Hei bakah hian District dang atanga hri kai enkawl tur BSF Sipai mi 2 nen Serchhip District-a hri kai enkawllai chu an vaiin mi 3 an ni.

Inkhunghrang mi 51 awm :

Serchhip District-a COVID-19 hri leng vanga inkhunghrang mi 51 an la awm mek a, heng zinga mi 45 te chu sawrkar in inkhkhunghranna tur hmun a siama inkhunghrang niin midang 6 te chu mahni In leh mahni hmunhmaa inkhunghrang te an ni thung.