Chanchin thar thenkhat :

JJM Meeting-ah Dy. CM tel

Nimin khan Union Minister of Jal Shakti, Gajendra Singh Shekhawat-a kaihhruaiin Jal Jeevan Mission Virtual Conference neih niin Mizoram atangin PHE Department changtu Deputy Chief Minister, Tawnluia chu a tel a, Deputy Chief Minister chuan kum 2023-ah Functional Household Tap Connections (FHTC) chu Mizoram-ah za-ah za neih a tum thu sawiin, Mizoram chhungah FHTC chu za zela 42.3 pek tawh a nih thu a sawi a. Mizoram thingtlang School leh Anganwadi zawng zawngah FHTC hi Jal Jeevan Mission kaltlanga pek vek tum a nih thu a sawi bawk. Jal Jeevan Mission-ah hian sawrkar laipui sum cheng vbc. 107.7 vel awmin vbc. 87.7 chu hman a ni tawh a, tunah hian cheng vbc. 19.83 hmuh ni leh tawhin State tum ve tur buaipui mek a ni.


Lawmthu sawina hlan

Siaha-a Children's Home hrang hrang leh District Child Protection Unit, Siaha tangkawp chuan nimin khan an District-a COVID-19 dona kawnga hmalatu- Health Department, Police Department leh District Level Task Force-te hnenah an hmalakna avanga lawmthu sawina atan naupangte thuziak chi hrang hrang an hlan a. Heng thilpek dawngtu Department pathumte hian Siaha khawpui chhunga Children's Home hrang hrang leh District Child Protection Unit, Siaha-te hmalakna chu chhuanawm an tih thu sawiin, duhsakna an hlan a ni.


LADC sawrkar ban phut zel

MNF District Hqrs. Lawngtlai-a Thalai pawl leh Women Front ten LADC-a BJP kaihhruai sawrkar chu thlawptu a ngah tawk lova puha bang tura an nawrna kal zelah nimin khan MDC te bakah LADC Staff te Pisa kai tur an dang leh a, hei vang hian MNYF President, Elvis Lalthang-zuala leh midang 10 te chu Police ten an man a, intiamkamna an ziah hnuah chhuahtir leh an ni. Hetihlai hian BJP Legislature Party lam chuan an sawrkar chu tualchara fiah chi a nih loh thu sawiin, dan angin House ah fiah an ngam thu an sawi.


AMC huamchhung Lockdown

Nimin-a Health Minister, Dr. R. Lalthangliana hova sawrkar mi pawimawh te thukhawmin an rawt angin Aizawl Municipal Corporation (AMC) huamchhunga hri leng avanga inkharkhipna kalpui mek chu tun thla ni 9 zing dar 4:30 thleng atan pawhsei leh a ni a, inkaihhruaina thar tihchhuah ah danglam lutuk awm lovin Aizawl Municipal Area-a luh leh chhuah (zin veivah) khap a ni a, Zirna In, Training Institute leh sakhaw biakna hmun te chu zing tawngtai Inkhawm telin khar a ni anga. Online-a zirtirna kalpui erawh chu phal a ni. Hospital-a OPD te chu tul bik thilah hawn theih an ni a, Hospital Emergency leh Casualty te chu dan pang-ngaiin hawn a ni anga, Private Clinic te erawh chu khar a ni ang.


BJP in pawi tih thu an sawi

BJP Mizoram Pradesh chuan COVID-19 hrileng chungchanga Health Minister, Dr. R. Lalthangliana'n COVID-19 hri inkaichhawnna chhutchah a nih tawh thu a sawi laia MNF thu-chhuah in hri inkaichhawnna chhut chah theih anih loh thu an sawi leh chuan MNF Party chu thuanghnih in an kal a ni tih a tilang chiang hle tih nimin khan thuchhuah siamin an tarlang a. Mizoram in hun khirh tak kan tawh mek laia sawrkarna chelh mektu te an in lungrual lo chu Mizoram mipui tan a pawi theih avangin pawi an ti takzet tih an sawi a. Health Minister in hri inkaichhawnna an chhut chah tawh thu a sawi hnu a hri nasa taka a hluar leh chhan chu VC/LC inthlan vang kha ni bera a lan thu an sawi bawk.


PWD leh YMA in Tuivawl Lei thiah hnatlang an nei

Mizoram leh Assam ramri buai avanga sawr-kar-in chakkhai lak nana Manipur leh Tripura lam kawng a cheithat mekah Langkaih Lei thawm-that nana chak hman turin Phullen kai, Tuivawl Lei hluihlawn tawh chu nimin khan thiah a ni. PWD Saitual Division thawktute leh Saitual Group YMA te tangkawp chuan Phullen kai, Tuivawl Lei (Bailey Bridge) hluihlawn tawh hi hnatlang in an thiat a, tun dinhmunah Tripura panna Langkaih Lei chu lirthei zawh atan duh thu a sam loh avangin a thawmthat nan Tuivawl Lei hlui hi thiat an nih thu PWD hotute leh Saitual Group YMA hruaitute chuan an sawi a. Tuivawl Lei thiah darh tak hi nimin vek khan Langkaih lamah phurh thlak nghal a ni. Mizoram atanga Tripura panna kawng thawmthat hna hi PWD chuan tunlai hian ngawrh taka thawkin hmun hrang hrangah kawng siam hna hi thawh a ni.


Hri leng vangin Zokhaw-thar-a luh leh chhuah khap

Tunhnaia Myanmar-a COVID-19 hri kai hmuhchhuah nu pakhat chu Zokhawthar-ah a cham avangin Zokhawthar VLTF chuan thu leh awm hma chu an khua-a luh leh chhuah an khap. Zokhawthar VLTF hruaitute sawi danin, Myan-mar lama COVID-19 hri kai hmuchhuah Nu pakhat hi Kolkata atanga rawn haw niin Cham-phai-a Quarantine Centre-a dah a nih hnuah sample endik atangin hri lakah a fihlim a. Hemi hnu hian Zokhawthar-a a chhungte In-ah October ni 1 khan a thleng a, October ni 20 khan Khawmawi, Myanmar pan lehin hetah hian khunghran leh a ni a, Sample endik-ah COVID-19 hri a kai tih hmuhchhuah a ni. Hetiang anih avang hian Zokhawthar VLTF chuan mipuite pawn chhuak lo tura hriattirna tichhuak nghalin, Zokhawthar khua a lut leh chhuak tur an dang nghal bawk a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn