Health Minister in mipuite hnenah ngenna siam

Health Minister, Dr. R. Lalthangliana chuan Aizawl Municipal Area-a inkharkhip puan mek chu pawngpaw puan ngawt a nih loh thu a sawi.

Nimin-a SAD Conference Hall-a thutkhawm neih ah Health Minister hian AMC huamchhunga inkharkhip kalpui mek chungchang hi sawiin, sawrkar chuan inkharkhip pawhsei chu a hreh hle tih a sawi a. “Amaherawhchu zau zawka thlirin nunna a hlu ber si a, bengsik-a ngaihtuah chung leh zau taka inrawn chungin lockdown hi pawhsei a ni,” tiin pawngpaw puan ngawt a ni lo tih mipuite pawhin lo hriat sak se a duh thu a sawi bawk.

Health Minister chuan Lockdown pawhsei avanga eizawnna kawnga harsatna tawk zawng zawngte ngaihdamna leh hriatthiamna a dil tih sawiin, “Ti lo ta ila harsatna lian zawk tawk thei dinhmunah kan ding bawk si nen, nunna kan ngai pawimawh ber lo thei lova, hemi atana a man kan pek ve a tul rih si a ni,” tiin mipuite hriatthiamna a ngen a. COVID-19 hri danna (vaccine) siam chhuah a nih hma chuan mipuite pawh fimkhur zual zel tura chahin, “Kan dinhmun thlir chung zela kan that tlanna tur ber ni a kan hriat hi min zawm sak hram hram ang che u,” tiin mipuite hnenah ngenna a siam bawk a ni.