Hri kai avanga enkawltu mumal neilo naupang te chungchang Health Minister hovin sawiho a ni

Mizoram-a COVID-19 hri kai hmuhchhuah zingah an fa te hri kai ve lo, In lama enkawltu neilo te buaipui dan tur chu nimin khan Health Minister, Dr. R. Lalthangliana hovin sawiho a ni a. Standard Operating Procedure (SOP) siam tur Committee an din nghal a ni.

SAD Conference Hall-a he sawihona hunah hian Health Minister, Dr. R. Lalthangliana chuan COVID-19 chungchang ah hian ngaihtuahna sen kim a har tih sawiin, “Vawiin-a tha deuh ni a kan hriat hi reilote ah siam that ngai a awm leh thin a, thil thar kan ngaihtuahna a awm phak lo te a rawn lang leh nawlh thin bawk a, kan thatpui dan tur ngaihtuah chungin theihtawp erawh kan chhuah reng a ni,” a ti.

He thutkhawmah hian COVID-19 hri kai nu leh pa CCC/DCH-a dah ngai, an fate hri kai ve lo, In lama enkawltu nei silo engemawzat an awm avanga an fate CCC/DCH a luhpui lo theilo an awm nual thu tarlan niin, heng naupang hri kai lova CCC lut zingah COVID-19 sample enfiah a nih hnua hri kai an awm tak thu tarlan a ni a. Tun dinhmunah CCC hrang hrangah naupang 7, anmahni enkawltu ber ten hri an kai si avanga loh theih loh a dahluh an awm thu tarlan a ni bawk. Heng naupang zinga upa ber chu kum 13 niin, midang zawng hi kum 10 hnuailam an ni.

Nu, naupawm lai COVID-19 hri kai, an fasen kalsan rem si lo te, chhungkaw member hri kai vek, nausen kum 2 mi chiah hri kai lo, kalsan theih si loh leh hetiang kaihhnawih case hrang hrang a awm theih thu leh case dang la awm thei te pawh he hunah hian sawiho niin, an chhungte nen tap chunga inthlah lova lungawi taka an inthlah theih a tul thu te sawilan a ni a, anmahni enkawlna bik hmun buatsaih a, ei leh in thlenga nutrition mumal tak an dawn thei a tul thu te sawilan a ni. COVID-19 hri kai zingah nu naupawm, hnute hne lai chuan an hruai theih thu leh hnutetui pek dan tur pawh mumal taka ruahman a nih thu tarlan a ni bawk.

Nimin-a thukhawm hian hetiang din-hmuna ding naupangte enkawl dan tur a rang lama ngaihtuaha Standard Operating Procedure (SOP) siam tur Committee an din nghal a, ni hnih (2) chhunga report thehlut turin an ti a ni. He thut-khawm ah hian Medical Operational Team Chairman Dr. ZR Thiamsanga MLA bakah sawrkar mi pawimawh dangte an tel a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn