Aizawl Republic Veng-a chhungkaw pakhat-a mi 5 thattu Court in thiamloh a chantir

Kum 2015 January thla-a Aizawl Republic Veng-a chhungkaw pakhat-a mi 5 lai thattu, Laltlanchhuaha chu Court in thiamloh a chantir a, tun thla ni 5 khian hremna tur puanchhuah a ni ang.

January ni 9, 2015 zan-a Aizawl Republic Veng-a Sangliansiama te chhungkua an In a luhchilha mi 5 lai thattu Laltlanchhuaha hi tualthah thubuai siam sak a nih hnuah a thubuai hi Addl. District & Session Judge Aizawl, Dr. HTC. Lalrinchhana chuan nimin khan thutlukna siamin Court chuan puh a nihna zawng zawngah thiamloh a chantir a. A chunga hremna pek tur erawh tunkar Ningani, Nov. 5, 2020 khian puanchhuah a ni ang.

Thudawn danin Court chuan Laltlanchhuaha hian mi panga te hi a thah ngei a ni tih nemnghetin, Section 302 of IPC hmangin vawi 5 (mi panga tualthat) hmangin thiamloh chantir a ni a. Sang-liansiama te awmpui pawh thah a tum ngeiah ngaiin, Section 307 of IPC hmangin thiamloh a chantir a, ani hi Laltlanchhuaha hian beiin Bathroom-ah a in kalhkhum vangin a him thung a. Hei bakah hian Court chuan Laltlanchhuaha hi ruihhlo leh rilru lama buaina a nei lo tih a finfiah bakah Sangliansiama chhungkua nen intihthiam lohna an nei lo tih a finfiah bawk a. Hemi a nih avang hian Laltlanchhuaha hi tualthah tumin Sangliansiama te In-ah a lutah a ngai a, Section 449 of IPC hmangin thiamloh chantir a ni.

Nimin a Court thuchhuak puan a nih lai hian Aizawl Republic Veng khawtlang hruaitu mi thenkhat te chu Court-ah hian an pungkhawm a, Republic Veng JAC chuan Court-in Laltlan-chhuaha chungchanga thudik taka thutlukna a siam chu lawmawm an tih thu sawiin, hremna pawh a na thei ang bera lekkawh ngei an beisei thu leh an phut bawk tih an sawi a. Court thutlukna hian chhiattawk chhungte rilru damna a pek an beisei thu leh Republic Veng khawtlang in an thlawp zel dawn tih an sawi bawk.

He tualthahna ah hian Laltlanchhuaha hian Sangliansiama, a nupui leh an fapa bakah Sangliansiama farnu leh an awmpui an chhungte pakhat chu a that a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn