Hri kai mi 26 hmuh belhin mi 183 enkawl dam an ni

Mizoram-ah COVID-19 hri kai mi 26 hmuh belh leh niin heng te nen hian Mizorma-ah hri kai hmuhchhuah zawng zawng chu 1786 an tling tawh.

Niminpiah khan ZMC Laboratory-ah Sample 1306 enfiah niin heng atang hian CO-VID-19 hri kai mi 23 hmuh thar leh an ni a, heng mite hi Aizawl District-a Sample lak vek niin mipa 20 leh hmeichhia 3 niin an zinga mi 7 te hi hri kai hmuhchhuah tawh te nen inkawmhnaih atanga hri kai hmuhchhuah an ni a, Chanmari atangin mi 4 bakah Tuithiang, Chaltlang leh Chawnpui Veng atangin mi pakhat theuh an ni a, midang 16 te hi State pawn atanga rawn haw te niin an zingah hian Assam Rifles mi 5 an tel bawk a ni.

Niminpiah vek khan District hrang hranga TrueNat Laboratory-ah Sample 145 enfiah niin heng atang hian hri kai pahnih hmuh an ni bawk a, Kolasib District leh Mamit District-a hri kai hmuh te niin Assam atanga rawn haw ve ve an ni. Rapid Antigen Test hmangin Sample 692 enfiah a ni bawk a, hri kai pakhat hmuh niin West Bengal atanga rawn haw, Pawan Hans Helicopter Pilot a ni thung.

Nimin khan Mizoram hmun hrang hrang atangin hri kai enkawl dam 183 te chu chhuahtir an ni a, heti hian Mizoram-ah hri kai hmuhchhuah 1786 awmin mi 1288 enkawl dam ni tawhin hri kai enkawllai 498 an la awm mek a ni.

India-ah hri kai 86,052 hmuh belh leh an ni :

Darkar 24 kalta chhungin India ramah COVID-19 hri kai 86,052 hmuh thar leh niin mi 81,177 te chu enkawl dam an ni bawk. Darkar 24 kalta chhung khan India ramah Sample 14,92,409 enfiah leh niin heng atang hian COVID-19 hri kai mi 86,052 hmuh leh an ni a, tun thlenga hri kai hmuhchhuah chu 58,18,570 an tling ta a ni. Darkar 24 kalta chhung khan India ramah hri kai 81,177 te chu enkawl dam ni bawkin hri kai enkawl dam zawng zawng chu 47,56,164 an tling tawh a, hri kai hmuhchhuah atanga zaa 81.74 te chu enkawl dam niin tunah hian hri kai enkawllai 9,70,116 an la awm mek a. Hri kai zingah nunna chan 92,290 an awm tawh bawk a ni.

Comments

Chhiar Hlawhte