SEDP hnuaiah man tlawm zawkin Sangha chi hralh

Serchhip District Fisheries Development Officer (DFDO) Office chuan nimin khan Serchhip Circle huamchhunga Sangha khawitute hnenah SEDP kaltlangin man tlawm zawkin Sangha chi an hralhchhuak.

Serchhip-a Fisheries Department hian nimin zing khan Serchhip DFDO Office atangin Sangha khawitute hnenah Sangha chi hi an hralhchhuak a, he hmalakna hi SEDP hnuaia kalpui niin Sangha chi hi rate pang-ngai ah chuan pakhat Rs. 4/- man hisap niin amaherawh chu SEDP atang hian zaa 70 chu tum sakin Sangha khawitute hian zaa 30 an tum ve thung a, hemi ang hian Sangha note pakhat hi Rs. 1.20/- zela hralhchhuah a ni.

Tun tumah hian Serchhip Circle huam-chhunga chhungkaw 93 te hnenah Sangha note 46,500 hralhchhuah a ni a, heng Sangha chi te hi IMC leh Exotic Carp (Fingerlings) te niin hemi hmalam hian Thenzawl leh Tuikum Circle-ah 1,18,600 pekchhuah a lo ni tawh a, karleh lamah Hrangturzo Circle-ah hralh leh a ni ang.

Tun tumah hian mi pakhat hnenah Sangha chi 500 zel hralhchhuah niin Sangha khawitute zingah changlo engemaw zat an awm nia thudawn a ni a, hemi chungchangah hian Serchhip DFDO, Lucy Lalrinpuii chuan Mizoram chhungah tun dinhmunah hian Sangha chi hi kan la intodelh tawk lo deuh tih sawiin, hei vang hian Mizoram Sawrkar chuan Sangha Chi a kan intodelh theih nan theihtawp chhuahin hmalak mek a nih thu a sawi a. Tunah hian Serchhip District bik tan Then-zawl-a Department Fish Farm leh Private Farm- LV Fishseed Farm-ah te Sangha note tam zawk tharchhuah tir tumin hma lak mek a ni a, nakum ah chuan harsatna hi sutkian deuh theih beisei a ni.