Serchhip District-ah inkhunghrang 1876 leh hri kai enkawl dam 160 an awm tawh

COVID-19 hri leng avangin nimin thleng khan Serchhip District-ah inkhunghrang mi 1876 an awm tawh a, mi 1699 te chu chhuahtir ni tawhin inkhunghrang mi 177 an la awm mek bawk.

COVID-19 hripui leng avanga sawrkar in State pawn atanga rawn haw te leh hri leng lo kai palh te nena lo inkawmhnai te inkhunghrang tura ruahmanna a kalpui tan atanga nimin thleng khan Serchhip District-ah hian inkhunghrang mi 1876 an awm tawh tih Serchhip CMO Office atanga kan thudawnna chuan a tarlang a, heng zinga mi 1699 te chuan an inkhunghranna hun hmang zovin chhuahtir an ni tawh a, nimin khan inkhunghrang hi mi 177 an la awm mek a ni. Serchhip District chhunga inkhunghrang zingah hian sawrkar hmunhma (Govt. Quarantine Facility)-a Centre inkhunghrang tam berin mi 938 an inkhunghrang tawh a, an zinga mi 786 te chuan an inkhunghranna hun hmang zo in mi 152 an la inkhunghrang mek a. Vantlang hmunhma, Kohhran Hall hrang hranga inkhunghranna hmun, Community Quarantine Centre-a inkhunghrang mi 208 awm tawhin heng mite hi chhuahtir vek an ni tawh thung a. Mahni In lama inkhunghrang pawh mi 730 awm tawhin an zinga mi 705 te chu chhuahtir an ni tawh a, tunah hian mahni In lama inkhunghrang mi 25 an la awm mek bawk a ni.

Hetihlai hian Serchhip District-ah hian hri kai mi 160 te chu enkawl dam an ni tawh thung a, Serchhip District-ah hian BSF Sipai zinga hri kai te enkawlna hmun, Nursing School CCC a awm avangin helai hmunah hian Mizoram hmun hrang hrang atangin BSF Sipai zinga hri kai te chu rawn dah thin niin nimin thleng khan helai hmuna enkawl mi 94 te chu enkawl dam an ni tawh a, District dang atanga hri kai rawn dah enkawlna bawk, Thenzawl AYUSH Hospital CCC atangin mi 58 enkawl dam ni tawh bawkin Tarpi Tlang SIRD hmun-a Dedicated COVID Health Centre (DCHC) atangin mi 5 enkawl dam an ni tawh bawk a, Chhiahtlang Tourist Lodge CCC atangin mi 3 enkawl dam an ni tawh thung a ni.

Serchhip District-ah hian nimin thleng khan hri kai hmuhchhuah tawh zawng zawng chu mi 36 an ni tawh thung a, an zinga mi 16 te chu enkawl dam ni tawhin mi 20 enkawl mek an la awm thung a, hmun hrang hrang atanga hri kai enkawl tur rawn dahluh an nih thin avang hian Serchhip District-a hri kai hmuhchhuah aiin Serchhip District-a hri kai enkawl dam ni nasa takin an tam zawk a ni.

Comments

Chhiar Hlawhte