Chanchin thar thenkhat :

MSSC inthlanna neih a ni

Mizoram State Sports Council (MSSC)-a kum 2020-2023 chhunga Vice President leh Joint Secretary thlanna chu nimin khan neih a ni a, Mizoram State Sports Council Executive Committee in a lo rel tawh angin COVID-19 avanga Home Quarantine a awm mek te leh, damlohna avanga a hmuna vote thlak theilo member, Aizawl Station a awm te tan Postal Ballot hmanga Vote thlak tir an ni bawk a, Member awm zawng zawng ten Vote hi thlakin Vice President atan V. Lalzawmliana, President, Mizoram Archery Association chu chuhtu awm lovin tlingah puan a ni a, Mizoram Table Tennis Association-a President, C. Lalrinzuala chu Joint Secretary-ah thlan a ni.


KVK in Ar vulh-ah hma la dawn

Krishi Vigyan Kendra (KVK), Kolasib District hnuaia Ar vulhtute dawmkanna leh Arsa leh Artui a intodelhna tur atan a duan, ‘Improving Livelihood and Nutritional Security through Backyard Poultry Production’ Project hawnna chu nimin khan Kolasib-ah neih a ni a, he Project kalpuina tur hian ICAR-Vivekananda Parvatiya Krishi Anusandhan Sansthan, Almora, Uttara-khand atangin cheng nuai 6 hmuh niin Zone 7-a KVK 43 zinga 5-ah kalpui tur niin Mizoram-ah chuan Kolasib hi thlan a ni a,khaw 5-Kolasib, Lungmuat, Thingdawl, Kawnpui leh Buhchang-phai-ah mi 10 theuh thlangin hmalak a ni ang.


VC Training buatsaih

Village Council inthlanna neih zawh taka Lunglei District chhunga VC thlantlin, President leh Treasurer te tana an hnathawh dan tur zirhona chu nimin khan a thawhkhatna atan neih tan a ni a, chawhma lamah Thorang bial chhung ami te tan neih niin chawhnu lamah West Tuipui bial a mi te tan neih leh a ni bawk. He hunah hian Village Council in dan hmanga ro an rel dan tur leh hna an thawh dan tur tlangpui leh 1st Mizoram State Finance Commission Grant hmanga hnathawh chungchang bakah hmasawnna hna thawhna tura sum an dawn te vawn dan tur zirtir an ni.


Vbc. 21.29 lut tawh

COVID-19 hri leng dona atana nimin thleng a Chief Minister's Relief Fund for COVID-19 a sum lut chu cheng vbc. 21.29 a tling tawh a, Committee on Utilization of CM Relief Fund for COVID-19 in ruahmanna an siam angin Rs. 19,34,48,588/- hman a ni tawh bawk a, nimin thleng khan mi tlawmngai ten sum hi an la thawh chhunzawm zel bawk a ni.

Comments

Chhiar Hlawhte