Mizoram Larsap in Dr. Sushi Singh lemziak tlangzarh

Mizoram Governor, P.S. Sreedharan Pillai chuan nimin khan Raj Bhavan Banquet Hall-ah Dr. Sushi Singh-in Lockdown chhunga lem ziah dan chi hrang hrang hmanga a ziah, Lemziak 30 te Lehkhabua (catalogue) a siam, “A timeless Journey Towards Real Freedom” chu a tlangzarh. Heng lemziak tlangzarh tak te hi Mizoram leh a chhunga chengte chungchang leh hlimthla te Lemziaktu in a hmuhdan tarlanna deuh vek niin TV Screen-ah enho chhunzawm nghal a ni.

He hunah hian Governor, P.S. Sreedharan Pillai chuan Corporate Social Responsibility (CSR) Advocator hlawhtling tak Dr. Sushi Singh kutchhuak ah te hian Mizo mipuite rilru thianghlimna, nelawmna leh hawihhawmna te fiah takin pholan a ni tih a sawi a. Dr. Sushi Singh hian hun reilote chhung chauh Mizoram-ah a pasal, SBK Singh, DGP a la rawn tawiawm rih a ni tih hriatloh khawpin Mizoram a hmu fiahin a ngaina hle tih a hriat a. A lemziak atang hian Mizo Culture leh Mizoram chungchang midangte hriatthiam turin pholan a ni a; a lawmawm hle a ni, a ti.

Lemziak tlangzarhna ah hian Dr. Sushi Singh hnen atangin Lemziak tura thutlukna siam chhan leh a lemziakte chu Mizoram leh Mizo Culture a hmuhdan tarlanna a nih dan te ngaihthlak a ni a. Lemziak te hi a vaiin 30 a ni a; Pencil-Charcoal, Water Colour, Acrylic-Canvas leh Knife Painting hmanga ziah te an ni.