Cheng nuai 422.70 senga Serchhip-a sak Judicial Officers' Residential Complex hawn a ni

Serchhip Khawtetlang-a cheng nuai 422.70 senga sak thar, Judicial Officers' Residential Complex chu nimin khan Gauhati High Court-a Judge, Michael Zothankhuma leh Gauhati High Court-a Judge leh Portfolio Judge for Serchhip District ni bawk, Justice Nelson Sailo te chuan an hawng.

Heng Judicial Officers' Residential Complex hawnna hunah hian Justice Michael Zothankhuma chuan Serchhip hmunah Judicial Complex ram tha tak an neih theih nana tha thawhtute zawng zawng chungah lawmthu sawiin, building mawi, nalh leh hmunhma nuam taka sak saktu Mizoram PWD chungah lawmthu a sawi a. Justice Nelson Sailo pawhin Serchhip District in District Jail leh Court building mai bakah Judicial Officer te chenna Complex tha leh nalh tak a nei ta chu District tan hmasawnna chhinchhiah tlak tak nia a hriat thu a sawi a. Heng hmunhma zawng zawngte hi mipuite ta, mipuite tana din leh siam anih angin, mipuiten duat takin enkawlpui se a duh thu a sawi bawk.

Aizawl Judicial District-a District & Sessions Judge, Joel Joseph Denga kaihhruai he hunah hian Er. Lalsangliana Chhakchhuak, SE, Project Circle PWD, Aizawl chuan Judicial Officers' Residential Complex sak dan chungchang report a pe a. Complex-ah hian Quarters Grade-I, Grade-II leh Grade-III te sak niin sum sanction zawng zawng zat chu cheng nuai 422.70 a nih thu leh Sanction zat hian fel taka sak zawh a nih thu a sawi a. Grade-I satu hi Bawithanga, Electric Veng, Aizawl niin, Grade-II hi Ralzatawna, Serchhip Bazar Veng leh Grade-III hi PC. Vanlalsawma, Serchhip Venglai te chuan an sa a, he Complex hi tha taka hungchhuah vek niin a hungna hi Brick meter 2-a sang leh Barbed Wire mater khat-a sang niin he hna hi Zahnuna, Zemabawk chuan a thawk a, a panna kawng meter 160 leh a tualzawl erawh Department in an thawk thung a, August 1, 2018-ah thawh tan niin kumin February 1 khan zawhfel a ni bawk.

Nimin-a Serchhip Judicial Officers' Residential Complex hawnna inkhawm hi Mizoram sawrkar-a Advider to Chief Minister, C. Lal-ramzauva bakah Law & Judicial-a Secretary, Marli Vankung, Gauhati High Court Aizawl Bench-a Registrar, Helen Dawngliani leh Law & Judicial Official pawimawh dangte, Gauhati High Court, Aizawl Bench a thawktute leh mi pawimawh dang pawhin an telpui a, Serchhip DC Kumar Abhishek, IAS leh Serchhip SP, R. Sathiyasundaram IPS bakah sawrkar mi pawimawh te pawhin telpuiin Bawrhsap hian lawmthu sawina hun a hmang bawk a ni.

Comments

Chhiar Hlawhte