COVID-19 hri leng avanga zirna In te hun rei tak khar a nih tawh hnuah Mizoram sawrkarin Aizawl Municipal Corporation (AMC) pawn lam, COVID-19 vei awmlohna khua ah School kal a rem tih hnuah District 6-a zirna In 112 te chu hawn phalna pek an ni tawh a, Serchhip District-ah pawh Zirna In hawn tan mek a ni bawk.
Lai Autonomous District Council (LADC) hnuaia Primary School 62 leh Middle School 47 ten School an hawn dan tur chu LADC Education Department chuan a duang fel ta.
Joint Action Committee (JAC) on Inner Line Reserve Forest Demand te chuan nimin khan Aizawl Press Club-ah thuthar lakhawmtute kawmin Mizoram chhung Aitlang leh Phainuam Buarchep-a Assam Police inkulh mek chu a rang thei ang bera nawrchhuak turin Mizoram sawrkar an phut thu an sawi a, ram an la let thei dawn lo a nih chuan laklet a nih theihna'n theihtawpa ke an pen tur thu an sawi bawk.
Niminpiah khan Mizoram-ah Sample 10,210 enfiah niin heng atang hian COVID-19 hri kai 639 hmuhchhuah an ni a, Sample enfiah atanga za zela 6.25 te chuan hri an kai a, Mizoram-a hri kai zingah mi sing li aia tam enkawl dam an ni tawh bawk.
Mizoram chhim lama Standard Hockey Field hmasa ber tur ‘Leitlangpui Hockey Ground’ bultanna tur lungphum chu nimin khan Sports Minister Robert Romawia Royte chuan Lunglei Salem Veng-ah a phum a. Lunglei Ramthar Veng-a Futsal Ground tur leh Lunglei Electric Veng-a Football field awmsa tih changtlunna tur leh Astro Turf Football Ground atana Phullem phahna tur lungphum a phum bawk.
Union Health Minister Mansukh Mandaviya hovin nimin khan India hmarchhak State 8-a Health Minister te chu COVID-19 hripui leng chungchangah an inkawm a, he hunah hian Mizoram atangin Health Minister Dr. R. Lalthangliana chu a tel a ni.
Nimin zing khawvar hma khan Aitlang, Vairengte Police duty-na bulah Silai hmehpuah leh a ni a, hemi chungchang hi Kolasib DC chuan nimin khan thuchhuah siamin a sawifiah.