Mizoram-ah hri kai thar 639 awmin 702 an dam thung

Niminpiah khan Mizoram-ah Sample 10,210 enfiah niin heng atang hian COVID-19 hri kai 639 hmuhchhuah an ni a, Sample enfiah atanga za zela 6.25 te chuan hri an kai a, Mizoram-a hri kai zingah mi sing li aia tam enkawl dam an ni tawh bawk.

Niminpiah khan ZMC-a RT-PCR Laboratory-ah Sample 1452 enfiah niin heng atang hian hri kai mi 134 hmuh an ni a, an vai hian Aizawl District-a Sample lak vek niin Bethlehem Vengthlang-ah hri kai mi 22 zet hmuhchhuah leh an ni a, a bak zawng hi Veng leh khua 33 ami an ni. Aizawl District-ah hian  Fluorescent Immunoassay (FIA) Test mi 7 atangin hri kai mi pakhat hmuh ni bawkin Aizawl Dinthar Veng ami a ni.

District hrang hranga TrueNat Laboratory-ah Sample 395 enfiah ni bawkin heng atang hian hri kai mi 18 hmuh an ni bawk a, Siaha leh Lawngtlai District-ah hri kai mi 4 ve ve hmuh niin Lunglei District-ah 3, Aizawl leh Champhai District-ah 2 ve ve leh Serchhip, Saitual leh Hnahthial District-ah pakhat theuh an ni.

Rapid Antigen Test hmanga Sample enfiah 8356-ah hri kai 486 hmuh an ni bawk a, an zinga 262 te chu Aizawl District ami niin Tlungvel-ah hri kai mi 21 zet hmuhchhuah an ni a, a bak Aizawl District ami te hi Veng leh khua 59 ami te an ni. Kolasib District-ah hri kai 97 zet hmuh leh ni bawkin Mamit leh Lawngtlai District-ah 32 ve ve, Lunglei District-ah 22, Champhai District-ah 13, Siaha District-ah 11, Hnahthial District-ah 10 leh Serchhip District-ah hri kai mi 7 hmuh an ni.

Nimin khan Mizoram-ah COVID-19 hri kai mi 702 te chu hri lakah fihlimin enkawl dam an ni a, Mizoram-a hri kai enkawl dam zawng zawng pawh mi sing li aiin an tam ta a ni. Heti hian nimin tlai dar 5:00 thlenga Mizoram-a hri kai hmuhchhuah chu 49,350 niin an zinga 40,358 te chu enkawl dam an ni tawh a, hei hi hri kai hmuhchhuah atangin zaa 81.78 niin hri kai enkawllai 8808 an la awm mek a, hri kai zinga mi 184 an boral tawh a ni.