Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

NE Health Minister ten hri leng sawihona an nei

Union Health Minister Mansukh Mandaviya hovin nimin khan India hmarchhak State 8-a Health Minister te chu COVID-19 hripui leng chungchangah an inkawm a, he hunah hian Mizoram atangin Health Minister Dr. R. Lalthangliana chu a tel a ni.

Assam Administrative Staff College, Guwahati-a he inkawmna ah hian Dr. R. Lalthangliana chuan nikum kumtir-a sawrkar laipuiin hripui leng vanga ralkhel dar a vuak veleh khan rang takin hma an la tih sawiin, hemi hnua hma an lak zui dan te a lem nen entirin a sawi a. Mizoram dinhmun tarlang bawkin, Mizoram chu India hmarchhak kila awm a nih vangin hripui hi a lut tlai deuh thin a, Second Wave pawh India ram hmun dang aiin a rawn thleng tlai tih a sawi a, hripui kai thar la sang viau in lang mahse a vawrtawp kan thleng tawh nia a lan thu leh tlakhniam lam kan pan ve tan nia a hriat thu a sawi a, hri kai la tam mahse mipui leh sawrkar an tanrual tlat avangin nunna chan erawh India ram hmun dang nen khaikhin chuan kan tlem thu a sawi bawk.

Contact Tracing leh Quarantine kalpui a nih dan te pawh Health Minister chuan sawifiahin, sawrkar Department hrang hrang, Police, NGO, Sakhaw hotute leh mipui aiawh khawtlang hruaitute an tangrual tha em em a, sawrkar laipuiin hri kaite enkawlna tura a ruahman DCH, DCHC leh CCC te bakah khawtlangin 4C an siam tih sawiin, hei hian hri kaite lakhran leh rang taka enkawlna kawngah nasa takin awmzia a neih phah a ni, a ti a. Hripui leng do tur hian hlawh beisei lovin a tul ang ang thawk turin Doctor pension tawhte, Private Nurse te, Healthcare Workers te leh mi tlawmngaite a tul ang ang thawk turin inpe tih a sawi bawk.

Hei bakah hian Vaccine pek chungchangah Mizoram chu India ram ah a titha pawl an ni tih tarlangin, Local Level Task Force te leh NGO bakah sakhaw hruaitute nen tang tlangin ruahmanna siam thin a ni, a ti a. Mipuite zirtirna pek kawngah nasa taka tan an lak vanga vaccine pek chhuah kawngah pawh hmasawn an nih thu sawiin, tunah hian kum 18 chung lam First dose la 83% niin Full Dose la hi 34% an nih thu a sawi a, reilote ah vaccine la thei chin chu an pek zawh thuai a beiseiawm tawh tih a sawi.

He hunah hian Health Minister chuan rawtna hrang hrang pawh thlenin Hmarchhak State ten harsatna hrang hrang an neih te sawihoa chinfel dan ngaihtuah turin Union Health Minister in Delhi-ah Meeting neih nise a ti a, Union Health Minister hnenah hian Hmarchhak State bikte Health Sector buaipui tur bik Officer dah rawtin, hemi atan hian Central Ministry-a Joint Secretary aia hniam lo ruat nise a ti a, DoNER Ministry atanga NLCPR hnuaia 10 % Hmarchhak State te tana dah hran chu Covid dona atana mumal taka hman zung zung a nih theih nana hma lakpui turin Union Minister hi a ngen bawk.

Comments

Chhiar Hlawhte