Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Ramri-a Silai hmehpuah chungchang sawifiah

Nimin zing khawvar hma khan Aitlang, Vairengte Police duty-na bulah Silai hmehpuah leh a ni a, hemi chungchang hi Kolasib DC chuan nimin khan thuchhuah siamin a sawifiah.

Hemi chungchanga thuchhuah a siamah Kolasib DC chuan he thil thlenna hmun hi Aitlang-a Mizoram Police duty-na hmun thlang, Bilaipur hnaih lam a nih thu sawiin thil thlen dan ngun taka chhui a nih hnuah Assam Police Duty-te hi silai hmet puaktu zawk an ni tih hriat a nih thu a sawi a. Vairengte mi 3, Hmeichhia pahnih leh mipa pakhat te chu Nibus-a tia hriat, Bilaipur mi chuan Ui lei tura chah chhuakin, Aitlangpui an thlen hnu hian Assam Police Duty-te chuan silai an hmet puak ta niin a sawi a. Anni pathum hi Silai a puah hnua an tlan darhna lamah an zinga pakhat chuan a ban a sawh na deuh nia hriat a nih thu leh midangte hi chuan hliam an neih loh thu a sawi bawk.

Kolasib DC chuan ramri hmun then-khatah buaina a chhuah loh nan Police-te duty tir a nih mek laiin mipuite pawhin harsatna an tawh palh loh nan tlawh lo turin a chah a. Assam Police duty-ten civil mite chunga silai an hmeh puah chungchanga lungawi lohna hi Hailakandi DC hnenah ziak a thlen a ni tih sawiin, Vairengte mi 3 thlem chhuaktu Nibus-a tia hriat hi zawng chhuak a thubuai siam sak ngei tura hriattir a nih thu a sawi bawk.

Kolasib DC chuan ramri-a buaina ti punlun zawnga thu thehdarh awm lo tura a duh thu sawiin, sawrkarin a tul apiangah hma a lak zel tur thu a sawi a. Ramri duty-na hmun hrang hrangte chu mipuite tan tlawh rih lo tura ngenna thuchhuah siam tawh chu harsatna a awm chhun-zawm loh nan zawm hram turin mipuite a chah nawn leh bawk. Hetihlai hian he thil thleng avang hian nimin lam kha chuan hmundang ah boruak duhawmlo a thlen zui hriat a ni lo thung.

Comments

Chhiar Hlawhte