Serchhip District-ah dan lova Kuhva tawlh bag 180 leh lirthei 5 Police ten an man

/

Serchhip District Executive Force Chhingchhip Police Out-Post a duty te chuan Inrinni zan khan Hmuntha Road-ah dan lova Kuhva tawlh bag 180 zet leh lirthei panga (5) an man leh a. Kumin chhungin April ni 10 thleng khan Mizoram Police te chuan dan lova kuhva tawlh hi bag 7,435 zet an man tawh bawk a ni.

Serchhip Police te hnen atanga thu kan dawn danin Chhingchhip Police Out-Post a Duty Police te hian Inrinni zan dar 9:15 vel khan Tuikum Lui (Hmuntha Road)-ah Motor 4 atangin dan lova tawlh nia hriat Kuhva ro bag 180, kg. 12,600 te hi an man a, heng te hi Laltlanchhuaha (29) khalh Tata Yodha (Mz-04A/5951) atangin bag 25; Lalrokima (42) khalh Tata-610 (Mz-04A/5327) atangin bag 50; Lalthazuala (21) khalh SML-Isuzu (Mz-04A/5358) atangin bag 55 leh Joel Lalrinsanga (31) khalh Tata LPK Truck (Mz-04A/6656) atangin bag 50 te niin an vai hian Champhai Ruantlang niin an insawi a, hei bakah hian heng Motor rawn vengtu leh Kuhva rah neitu nia hriat Rothanmawia (26), Champhai Zotlang nia insawi pawh a motor Tata Yodha (Mz-04A/4423) nen man tel a ni bawk.


Rothanmawia sawi danin heng Kuhva ro te hi Champhai Zotlang atangin Khawzawl kaltlangin Rabung-Kawlkulh-Chhawrtui-Maite-Hmuntha-ah rawn phurh a ni a, Aizawl-a cheng nia insawi Zohmingi nen Zemabawk-a inhlanchhawn tur niin a sawi a. Heng Kuhva ro leh a neitu nia hriat bakah a phurhna te hi Lunglei-a Custom Preventive Force kut-a hlan tura tih a ni.

Hetihlai hian Mizoram Police te chuan kumin January atanga April ni 10 chhung khan dan lova kuhva ro tawlh an man zat chu bag 7,435 (kg. 5,44,030) niin Rs. 31,72,70,600 man hu a tling bawk. Mizoram Police thuchhuah tarlan danin, kuhva ro man kaihhnawihah hian thubuai 19 ziahluh tawh niin mi 61 man an ni tawh a. Kuhva rah tawlh hi District 7-ah man awmin Aizawl District-ah man tam ber a ni a, bag 2,321 manin Rs. 27,63,60,000/- man a ni a. Kolasib District-ah bag 1,251 manin Rs. 1,08,53,400/- man a ni bawk a. Champhai District-ah bag 1,186; Khawzawl District-ah bag 1,033; Serchhip District-ah bag 622; Saitual District-ah bag 596 leh Hnahthial District-ah bag 426 man a ni tawh bawk.

Comments

  1. Anonymous17 April 2023 at 21:59

    Champhai Ruantlang mi pakhat mah an tel lo. Ruantlang anga inchhâl te khi Ruantlang khaw ṭhenawm Mualvêng khaw mi vek an ni e.

    ReplyDelete

Post a Comment

Popular News (Last 30 Days)

SDVA in hruaitu tur thlang

/
Image
Serchhip District Volleyball Association (SD-VA) chuan nimin khan khan Serchhip Kawnpui VC Hall-ah kum 2024-2025 chhunga an Pawl hruaitu tur thlanna an nei a, President-ah K. Tlangthanmawia (Bazar Veng); Sr. Vice President-ah VL. Hruaitluanga (Bazar Veng); Vice President-ah H. Rohmingliana (Chhim Veng); General Secretary-ah Zothansanga (Chhim Veng); Joint Secretary-ah Jerry Lianhming-thanga (Vengchung) leh Zoramthara (Darnam Veng); Treasurer-ah C. Lalhruaitluangi (Chhiah-tlang Kawn Veng) leh Fin. Secretary-ah R. Lalhnehzauva (Vengchung) te thlan an ni.
Kimchang zawkin »

Truck 8-ah Kuhva ro man

/
Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.
Kimchang zawkin »