Kumin a HSSLC Exam result tihchhuah niin zirlai exam zinga 82.07% ten an pass

Mizoram Board of School Education (MBSE) chuan kumin a pawl 12 tana Higher Secondary School Leaving Certificate (HSSLC) Exam a buatsaih result chu nimin khan a tichhuak a, kumin hian zirlai Exam 11,908 zingah 9773 te pass in pass percentage chu 82.07 a ni a, nikum (87.80%) aiin 5.73% in pass an tlem zawk a ni.

MBSE in kumin-a HSSLC Exam a buatsaih ah hian Exam tura inziaklut zirlai 12,301 awmin an zinga mipa 5606 leh hmeichhia 6302, an vaiin 11,908 te chuan Exam hi an hmachhawn a, heng zinga mipa 4599 leh hmeichhia 5174, an vaiin zirlai 9773 te chu pass in pass percentage chu 82.07 a ni a, zirlai naupang 2068 fail an awm laiin 67 te chuan Subject bat an nei thung a ni. Tun tumah hian Distinction-ah zirlai 821 pass in 1st Division-ah 4058, 2nd Division-ah 3559 leh 3rd Division-ah 1335 an pass a. Kumin hian Arts, Science leh Commerce-ah pass awm lohna School an awm lova, Accountancy Subject bikah JK. Lalchhanhima S/o Johny Lalthanmawia, Oikos HSS chuan Subject mal-ah mark 100-ah 100 hmu thei a, kuminah Subject mal-ah amah chauh hi Full Mark hmu awmchhun a ni bawk.

Kumin hian Arts-ah zirlai 9007 ten Exam hmachhawnin an zinga 7586 an pass a, 84.22% pass ang niin Subject bat nei 58 an awm laiin 1363 te an fail a, Lalrohlui Ralte D/o Lalduhoma Ralte, Synod HSS Aizawl chu pakhatna a ni a, Distinction-ah 620, 1st Division-ah 2724, 2nd Division-ah 2965 leh 3rd Division-ah 1277 ten an pass a ni. Science Subject-ah zirlai 2212 ten Exam hmachhawnin 1667 an pass a, 75.36% pass in Subject bat nei 8 awmin 537 an fail thung. Simon Lalremsiama Shangpliang S/o Kyrshan Shang-pliang St.Paul’s HSS, Aizawl  chu pakhatna niin Distinction-ah 137, 1st Division-ah 1128, 2nd Division-ah 388 leh 3rd Division-ah 14 an pass a ni.

Commerce-ah zirlai 689 exam in 520 an pass a, pass percentage chu 75.47 niin Subject bat nei mi pakhat awmin 168 an fail thung a, Mercy Lalthansangi D/o C. Zonunthara, Oikos HSS chu pakhatna niin Distinction-ah 64, 1st leh 2nd Division-ah mi 206 ve ve leh 3rd Division-ah mi 44 an pass a ni.

Town chhunga School titha :

Nimin-a Pawl 12, Higher Secondary School Leaving Certificate (HSSLC) Exam result tih-chhuah takah SerchhipTown-a zirna In hrang hrangte chu an titha thawkhat niin a lang. HSSLC result tihchhuah takah hian Serchhip Town atangin Arts Stream-ah Govt. HSS Serchhip atangin zirlai 100 Exam in 95 an pass a, Subject bat nei mi pakhat awmin zirlai 4 an fail thung a, 95% in an pass a ni. Distinction-ah mi pakhat pass in 1st Division-ah 16, 2nd Division-ah 43 leh 3rd Division-ah 35 in an pass a ni. Brilliant HSS atangin zirlai 35 exam-ah 33 an pass a, mi 2 fail in 94.28% in an pass a, 1st Division-ah 15, 2nd Division-ah 11 leh 3rd Division-ah 7 ten an pass a ni.

Eklavya Model Residential School, Ser-chhip atangin zirlai 27 exam-ah 26 an pass a, mi 2 fail in 96.29% pass ang an ni a, 1st Division-ah 14 leh 2nd Division-ah 12 an pass a ni. Chhiah-tlang HSS atangin zirlai 20 te exam in an pass vek thung a, Distinction-ah 3, 1st Division-ah 9, 2nd Division-ah 7 leh 3rd Division-ah pakhat in an pass a ni.

Science Stream-ah GHSS Serchhip atangin zirlai 30 exam-ah 28 pass in pahnih an fail a, 93.33% pass ang an ni a, Distinction-ah 1, 1st Division-ah 11, 2nd Division-ah 15 leh 3rd Division-ah mi pakhat in an pass a. Eklavya Model Residential School Serchhip atangin mi 8 exam-ah 2 chauh an pass thung a, mi 6 fail in pass percentage chu 25% a ni a, 1st Division leh 2nd Division-ah mi pakhat ve ve an pass a. Private Candidate mi pakhat awm bawkin 2nd Division-ah a pass a ni.

Serchhip District-ah Commerce zirna Brilliant HSS-ah awmin zirlai 11 exam-ah 10 in an pass a, mi pakhat a fail thung a, 90.90% pass ang an ni a, 1st Division-ah mi 5 pass in 2nd Division-ah 3 leh 3rd Division-ah mi 2 in an pass bawk a ni. Hei bakah hian Serchhip District chhunga zirna In dang te pawh an titha thawkhat viau bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man