Serchhip-ah World No Tobacco Day hman a ni

Nimin khan khawvel ram hrang hrangah mihring te tana Meizuk thatloh zia inzirtirna ni, ‘World No Tobacco Day’ chu hman niin Serchhip-ah pawh National Tobacco Control Programme (NTCP) ruahmanna ni All Saints School-a zirlai naupangte nen hun hman a ni.



‘World No Tobacco Day’ puala hun hman hi All Saints School Headmistress Sister Shanti Lobo chuan kaihruaiin kumin-a he ni thupui, ‘Tobacco threat to our Environment’ tih hmangin NTCP-a District Nodal Officer Dr. Lalngaihawmi Chhangte chuan thu a sawi a. Zuk leh hmuam in a huam chin tarlangin, Vaihlo-ah hian kan taksa-a natna hrang hrang thlen thei a tam thu leh chung zingah chuan Cancer thlen thei pawh tam tak a awm thu sawiin, hei vang hian zirlaite chu zuk leh hmuam tichhin lo turin a chah a. Meizial zu te bula awm chu a zu ve lo tan pawh a hlauhawm theih dan te a tarlang a, Vaihlo kaihhnawih hmang thin zinga nghei duh te tan Serchhip District Hospital OPD bulah Tobacco Cessation Clinic (TCC) chu pan theih reng a nih thu te a sawi bawk a ni.

He hunah hian NTCP-a District Consultant K. Hmingthansangi chuan zirlai naupangte tan zuk leh hmuam thatloh zia inzirtirna atan Quiz a buatsaih bakah zirlai naupangte hian zuk leh hmuam ti lo tura intiamna thu an chhamrual bawk a. He programme hman zawh a nih hnu hian ‘Kick the Butt in the Trash’ tih hmangin zirlai naupangte hian an School atanga IOC Kawn thleng Rally an nei a, he hunah hian zuk leh hmuam thatloh zia inzirtirna thuziak te an ken bakah kawngpui dung-a bawlhhlawh, Sikret bung nawi awm te an chharkhawm nghal a ni.

Comments

Popular News (Last 30 Days)

LPG man bithliah thar