COVID-19 hri kai enkawllai 106 la awm mek

Niminpiah khan Mizoram-ah COVID-19 hri kai mi 19 hmuh belh leh niin nimin khan hri kai zingah mi 36 te enkawl dam an ni thung.

Niminpiah khan Mizoram-ah Sample 310 enfiah niin heng atang hian COVID-19 hri kai mi 19 hmuh belh an ni a, heng hri kai hmuhchhuah te hi Rapid Antigen Test hmanga Sample enfiah atanga hri kai hmuh te vek niin Serchhip leh Saitual District-ah mi 5 ve ve, Aizawl District-ah 4, Lunglei leh Kolasib District-ah mi 2 ve ve leh Hnahthial District-ah mi pakhat te an ni a. ZMC-a RT-PCR Laboratory-ah Sample pahnih enfiah niin TrueNat Laboaratory-ah Sample pakhat enfiah awm bawkin hri kai hmuhchhuah erawh an awm lo thung.

Nimin khan Mizoram-ah COVID-19 hri kai enkawl dam mi 36 an awm belh ve leh bawk a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,28,317 niin an zinga 2,27,513 te chu enkawl dam an ni tawh a, hri kai atanga za zela 99.65 te chu enkawl dam ni tawhin hri kai enkawllai mi 106 an la awm a, hri kai zingah mi 698 an boral tawh bawk a ni.