Chhiahtlang khuaa KRAM Infracon Pvt. Ltd. te Volleyball Court laih sak hawn a ni

Chhiahtlang Hmar Veng Branch YMA hmalakna a Chhiahtlang hmarlam dai-a Volleyball Court siam thar chu nimin khan KRAM Infracon Pvt. Ltd. Chief of Project Amit Goel chuan hawngin hemi puala Volleyball Tournament buatsaih pawh a hawng nghal bawk.




Chhiahtlang Hmar Veng Branch YMA President Lalneihkima Varte kaihhruai he hunah hian KRAM Infracon Pvt. Ltd. Chief of Project Amit Goel chuan hetianga Chhiahtlang-a Volleyball Court hawn theih a ni chu lawmawm a tih thu sawiin, an Company chu NH. 54 laihzauh leh siam that hna thawk tura rawn kal an nih thu leh he hna an thawh ah Chhiahtlang VC leh YMA ten nasa taka an tawiawmna leh an puihna ah lawmthu a sawi a, kawng siam hna an thawh mek hi an thawh zawh a nih hunah chuan Mizoram intodelhna atana leh kawng hrang hrangah pawh thil tangkai tak a ni dawn tih a sawi a. Mizoram tana hna tha taka an thawh chu India ram tan pawha hna tha a ni tih sawiin, an hnathawh zelna turah pawh an tawiawmna leh tanpuina an la mamawh dawn thu bakah an la pur fo dawn tih a sawi a. Infiamna pawimawh zia pawh sawiin, inelna ah hlawhtlinna an chang vek lo a nih pawhin an taksa tana thil pawimawh a ni tih hre reng turin a chah bawk.

He Volleyball Court hawnna hunah hian Chhiahtlang North VCP C. Lalrawna pawhin Chhiahtlang-ah KRAM Infracon Pvt. Ltd. te zara Volleyball Court tha tak an nei leh a hawnna neia hemi puala Tournament hial buatsaih theih a ni chu lawmawm a tih thu a sawi a. National Highway-54 laihzauh avangin an khawchhung ah hmel danglamna nasa tak thlenga an thil hlu tak tak te an chan laia malsawmna tam tak an dawn thu a sawi a. Chhiahtlang Hmar Veng-a YMA Volleyball Court chu he kawngpui laihzauh avanga tihchhiat a nih avanga YMA in zangnadawmna Rs. 81,600/- an dawn tur pawh a vaiin VC ten an pek fel tawh thu a sawi bawk a ni.

NH. 54 laihzauh leh siamthat hna thawh a nih avang hian Chhiah-tlang Hmar Veng Branch YMA te Volleyball Court chu laihchhiat a ni a, hei vang hian Chhiahtlang Hmar Veng Branch YMA te enkawl Vantlang ram, Highway Restaurant bula mi chu Volleyball Court siamna atan hmangin kawngpui laih hna thawktu KRAM Infracon Pvt. Ltd. chuan a laih hna leh PCC Slab hmanga Volleyball Court siam hna hi an thawh sak a, mipui thutna turte pawh laihsak nghalin hei hi concrete a la siam leh theih tura ruahman a ni bawk.

He Volleyball Court thar lawmna atana Volleyball Tournament buatsaih ah hian Team 9 telin khual atangin Team pakhat an tel a, an khelh zawh hun tur erawh hriat theih ala ni rih lo a ni.

Comments

Popular News (Last 30 Days)

Vawiin-ah HSSLC Exam result