Mizoram PMAY-G kalpui dan Governor hrilhfiah

Mizoram Governor Hari Babu Kambhampati chuan nimin khan Rural Development Department hotute kawmin Mizoram-a Pradhan Mantri Awaas Yojana - Gramin (PMAY-G), Housing for All Scheme tia hriat bawk kalpui dan leh an harsatna te a zawt.

Raj Bhavan-a inkawmna neih ah hian Rural Development Secretary R. Zarzosanga leh Deputy Secretary Zoremthara Ralte te chuan Mizoram-a PMAY-G hnuaia In sak tanpuina kalpui dan a lem nen an sawifiah a, PMAY-G Scheme hi kum 2022-a tawp tur ni mah se kum 2 dang atan pawhseih a ni a. Permanent Wait list hnuaiah Insak tanpuina dawng turin chhungkaw 13,533 ziahluh an ni a, tunah hian chhungkaw 13,532 tan In sak tanpuina santion ni tawhin heng zinga In 5511 chu sak zawh tawh a ni a, abak In 8021 hi la sak mek a ni.

Rural Development Department chuan Survey nei tha leh vekin In sak tanpuina mamawh tam tak an awm tih a hmuh belh a, heng In sak tanpuina dawn mamawh te hi AWAAS Plus software hmangin a thehlut leh tawh a. AWAAS Plus a thunluh list 25,539 zinga 6980 hi Central in allocation/target a siam tawh a. PMAY-G Awaasoft Permanent wait list hnuaia In sak hna zawh a nih veleh thawh tan a ni dawn a, Awaas+ hnuaiah sawrkar kum 2021 -22 chhungin in 6980 sak leh hman tum a ni.

He hunah hian Governor Hari Babu Kambhampati chuan Mizoram in In sak tanpuina kaltlanga chenna In tha tak mi tam tak tan a sa leh hemi atan Inhmun ah te harsatna a awm lo chu thil lawmawm tak a ni tih a sawi a. PMAY-G hmanga In sak sak a nih zawh rualin chenna In-a awm tur thil pawimawh dangte pawh convergence kaltlangin Scheme hrang hrang hmangin a awm thei tura beisei a ni a. RD chu Nodal Department a nih angin hmalatu a ni tur a ni tih sawiin, RD in Convergence kaltlanga a thawhpui tur Department te pawhin tha takin RD Department an thawhpui a ngai a ni, a ti bawk. Hei bakah hian Governor chuan SECC 2011 hnuaia In sak lai mek te tha taka an thawh zawh thuai a, AWAAS Plus hnuaia I sak hna thawh tur pawh an tan thuai thuai a, Fund tam zawk Mizoram hmasawnna atana nawrchhuah tum turin RD Official te a chah bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man