Prime Minister in Central Scheme tanpuina dawngtute a kawmna hun Serchhip atangin lo zawm a ni

India ram zalenna champhaphak vawi 75-na lawmna, Azadi ka Amrit Mahotsav kal zelah nimin khan India Prime Minister Narendra Modi chuan Himachal Pradesh khawpui Shimla-ah Sawrkar Laipuiin mipui dinhmun chawikanna tur Scheme hrang hrang a neihte puanzarna a nei a, he hun hi Serchhip atang pawhin sawrkar mi pawimawh ten an lo zawm a ni.

Prime Minister hova hun hman ‘Garib Kalyan Sammelan’ tan hma hian Serchhip District-ah chuan DC Conference Hall-ah hun hman hmasak niin he hun hi SDO (Sadar) Lalzikpuii chuan a kaihruai a, he hun hmanpuitu Addl. DC Lalmuansanga Ralte chuan India sawrkarin mirethei te chawikanna tura hmalakna a duan thinte zarah India ram chu kum reilote chhungin khawvela ram ropui berte zinga mi ah a inhlangkai tih a sawi a. Heng hmasawnna hmalakna te hi Mizoram mipuite pawhin kan chhawr nasa thin hle tih sawiin, Sawrkar atanga tanpuina leh chhawmdawlna dawngtuten dik tak leh tangkai taka hmanga, hmasawnpui nana lo hmang ngei thin turin a chah bawk a ni.

He hunah hian sawrkar laipui ruahmanna kalpui mektu sawrkar Department ten mipui tana an hmalakna te tarlangin PHE Serchhip WATSAN Division-a Sr. EE, Er. F. Lalsanglura chuan Jal Jeevan Mission hnuaia an hmalakna te a tarlang a, District Urban Development Officer Lalthanghliri Pautu chuan PMAY Urban, PM SVANidhi Scheme leh Swachh Bharat Mission hnuaia an hmalakna te tarlangin, District Civil Supply Officer Lalthanmawia chuan One Nation One Ration Card leh PM Garib Kalyan Anna Yojana hnuaia an hmalakna te a tarlang bawk a, he hunah hian Serchhip District-a heng Scheme kalpuitu Department Officer te, tlawmngai pawl hruaitute leh Scheme dawngtu mi engemawzat an tel a ni.

Hemi hnu hian Prime Minister in Shimla atanga ram pum huapa inkawmhona hun a buatsaih chu thlunzawm a ni a, he hunah hian sawrkar department pakua kaltlanga kalpui mek Central Scheme hrang hrang sawmparuk (16) hnuaia tanpuina dawngtute nena hun hman niin he programme hi live a pekchhuah niin ram chhung hmun hrang hrang 1500 atangin an chhim a ni.

Azadi ka Amrit Mahotsav hi March 12, 2021 atanga bultanin August 15, 2023 thleng, kar 75 chhung rampum huapin kalpui tur a ni a, Mizoram-ah chuan District leh Department puala hun hman ni tawhin Roundtable on Eco-Tourism, Roundtable on Role of Bamboo, Presentation of Best Practices neih a ni tawh a. Hmabak chi thum - Har Ghar Jandha (August 9 - August 16, 2022 chhunga In tina India Flag zar) te, Amrit Sarovar - thingtlanga tuihna siamthat leh tihpun bakah De-criminalisation of laws for ease of living and ease of doing business te la kalpui tur a ni ang.