Serchhip District-ah Shelter for Urban Homeless hnuaia hmalakna tura rawtna pawm a ni

Nimin khan Serchhip-ah DAY-NULM hnuaia Serchhip District Executive Committee on Shelter for Urban Homeless chu thukhawmin sawrkar kum kal meka hmalakna tura rawtna awm te State Executive Committee pawmpui tura thlen nise an ti.

He thutkhawm Serchhip DC Meeting Hall-a neih hi an Chairman leh Serchhip District Bawrhsap, Kumar Abhishek IAS chuan kaihruaiin Meeting hmasa in kumin sawrkar kum kal mek, 2020-2021 atana Shelter Home pali (4) ten an mamawh an lo thlen tawh te chu State Level-a thlen tura pawmin, ZOAR Urban Deprived Childrens Home leh Unity Orphanage Home tan Geyser, Water Cooler leh Fire Extinguisher niin, Observation Home tan Geyser, Washing Machine leh Water Cooler te a ni a, hei bakah hian Serchhip-a khawpui-a chenna neilo te tana chenna In tur lo sak tawh chu chhungkua-a chenna atana hman theih tura siamthat rawtna pawh an pawm nghal niin hemi atana sum mamawh tur ruahman pawh an pawm a, hei hi tih puitlin a nih hunah chuan chhungkaw pahnih an khawsa thei dawn a, heng an pawm tak te hi State Executive Committee pawmpui tura thawn a ni ang.

He thutkhawm ah hian Serchhip District Urban Development Officer leh District Executive Committee-a Member Secretary, Vanthangpuii chuan an hmalakna tlangpui tarlangin, DAY-NULM tia hriat, Deendayal Antyodaya Yojana-National Urban Livelihood Mission chu khawpui-a mirethei chawikanna tura ruahman a nih thu sawiin, hemi hnuaiah hian hmalakna tur peng (component) panga (5) a awm thu a sawi a, Self-Help Group (SHG) te kaltlanga hmalakna buaipuitu, Social Mobilization and Institutional Development (SM&ID) te, eizawnna nei tura thiamna pek tura zirtirna, Employment through Skill Training and Placement (EST&P) te, eizawnna mumal an neih theihna tura Bank kaltlanga Loan hmanga tanpuina, Self Employment Programme te, khawlai-a thil zuar te dinhmun chawikan dan tur ngaihtuahna, Support to Urban Street Vendor leh mirethei In leh lo neilo te tuamhlawmna tur, Scheme of Shelter for Urban Homeless te a nih thu a sawi a.

Nimin-a thutkhawm hi Scheme of Shelter for Urban Homeless (SUH) hnuaia hmalakna a nih thu pawh DUDO chuan sawiin, he hmalakna in a tum ber chu khawpui-a mi vakvai In leh lo neilo chenna buatsaih sak leh chu an chenna ah chuan an mamawh chi hrang hrang phurhruk sak te a nih thu a sawi a. He hmalakna hnuaiah hian Serchhip-ah Home 7 te an enkawl pui thu leh heng te hi Adult Rehabilitation Centre te, Beiseina In Old Age Home te, ZOAR Urban Deprived Childrens Home te, Unity Orphanage Home te, Observation Home te, Shalom Special School leh Urban Homeless Shelter an sak te chu a nih thu a sawi bawk.