Chanchin thar thenkhat :

Civil Sub-Division tur tifel

Mizoram sawrkar chuan Saitual, Hnahthial leh Khawzawl District hnuaia Civil Sub- Division te leh an hnuaia khua awm turte chu tifelin tun thla ni 9 khan Order pawh tihchhuah a ni a. Saitual District-ah Saitual Sadar Sub-Division hnuaiah khaw 26 awmin Ngopa Civil Sub-Division hnuaiah khaw 13 a awm ang. Hnahthial District-a Hnahthial Sadar Sub-Division hnuaiah khaw 26 awmin Civil Sub-Division a awmlo thung a, Khawzawl District-ah Khawzawl Sadar Sub-Division hnuaiah khaw 28 awmin Civil Sub-Division a awm lo bawk a ni.


Kaihhruaina ti danglam hret

Mizoram sawrkar chuan tun thla ni 7-a ‘CO-VID-19 No Tolerance Drive’ kaihhruaina a lo siam tawh thenkhat chu ti danglamin heng zingah hian loh theih loh thila mipui punkhawm a tul a nih chuan punkhawmna tur hmuna leng zat 50% aia tam lovin DC ten punkhawm phalna an pe thei anga, pungkhawm erawh mi 35 aiin an tam tur a ni lo a. Thil pawimawh bik vanga sawrkar/Sakhuana thila mipui punkhawm a tul a nih chuan punkhawmna tur hmuna leng zat 50% aia tam lovin DC ten phalna pein mipui pungkhawm hian mi 100 an pel tur a ni lo bawk.


Consultation Meeting nei

Nimin khan Lunglei-ah Mizoram Science, Technology & Innovation Council (MISTIC) buatsaihin sawrkar Department ten an hnathawhna leh hmalakna hrang hranga Science & Technology an hman tangkai theih dan tur leh an mamawh te zirchianna leh inrawnkhawmna hun, District Level Consultation Meeting on Mapping of Science & Technology needs of States/UTs’ chu Video Conference hmangin neih a ni a. He Mapping exercise kaltlang hian MISTIC chuan District hrang hranga Department hotute kawmin an mamawhte leh an harsatna neihte sawipuiin, Science and Technology thiamna hmanga heng harsatnate hi tanpui leh sutkian theih dan tur an ngaihtuah a ni.


INC in Candidate puang

Lai Autonomous District Council (LADC) MDC bial 25-a inthlanna thla thar Dec. 4-a neih tur atan nimin khan Congress Party chuan an Candidate tur a thawhkhatna atan an puang a, he hunah hian bial 15-a an Candidate tur leh Independent Congress thlawptu (Independent for Congress) pathum, an vaiin candidate 18 an puang a, he hun hi MPCC Treasurer, Zodintluanga leh Aizawl lama Party hruaitu thenkhat ten an telpui a ni.


Naupang bo ruang hmu

Nilaini kalta a chin hriatloh a bo, Lalsiam-thara (2), Vairengte chu Mizo dan-a ni 7 an zawnna ni, nimin khan a ruang hmuh a ni a, a bona atanga KM 2 leh a chanve vela hla-a Tuidai Khur lui-ah a ruang hi hmuh a ni. Lalsiamthara ruang an hmuhna hi hmun chhengchhe tak, mihring tan pawha pawh kal har tak a ni a, a ruang hi nimin khan an chenna In-ah lain Vawiin-ah Postmortem in vuiliam a ni ang.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn