MPCC in Mizoram-a MLA 4 te Office of Profit Dan bawhchhia ah ngaiin an chunga action lak an phut

Mizoram Pradesh Congress Committee (MPCC) chuan Mizoram-a MLA nilai mi 4 te chuan Office of Profit dan an palzut nia an hriat thu sawiin, hei vang hian Article 192 (1) tlawhchhanin heng MLA 4 te chungah hian Dan anga action la turin Mizoram Governor chu an ngen.

Mizoram Pradesh Congress Committee (MPCC) hian Mizoram-a MLA pali - Dr. Vanlalthlana, Prof. F. Lalnunmawia, L. Thangmawia leh Dr. Vanlaltanpuia te chu Office of Profit Dan palzut ah puhin nimin khan Mizoram Governor hnenah Dan anga hma la tura ngenna hi an thehlut a, he lehkha hi MPYCC President, Dr. Lalmalsawma Nghaka chuan nimin khan Governor hnenah thehlutin, Governor Secretary, K. Lalthawmmawia chuan Governor aiawhin a lo dawng a, complaint lehkha-ah hian MPCC aiawhin Lalthanglawra Ngurte, Secretary MPCC leh S. Lalrinawma, Gen. Secretary, MPYCC ten hming an ziak a ni.

MPCC chuan kum 2018 Mizoram Legislative Assembly General Election-ah khan MZU/PUC-a zirtirtu thawklai heng mite hi MLA-ah thlantlin an ni tih sawiin, MZU Dan-in a phal angin Teaching Staff te hian Civic Right an nei a, amaherawhchu, chung MP/MLA a thlantlin te chuan University-ah emaw, State Legislature-ah emaw an duhna zawk zawkah hlawh an la thei ang tih a ni tih an sawi a. “Hetihlai hian heng MLA pali (4) te hian Mizoram University atanga hlawh (Emolument/Pay) la reng chung hian Mizoram Legislative Secretariat atangin MLA te tana hamthatna (Facilities) an la leh vek a. MZU ah hlawh an la a nih chuan, MZU-a Facilities awm ang ang leh an Entitle chin kha an la vek tur a nih laiin, MZU-ah hlawhpui chauh la a, MLA anga hamthatna dang zawng zawng dawng tura thltlukna an siam leh lawi si hi Dan bawhchhiatna chiang tak a ni,” tiin University atangin heng MLA te hian Leave an la lo bawk niin an sawi.

Heng MLA te zinga MNF MLA 3- Prof. F. Lalnunmawia, L. Thangmawia leh Dr. Vanlaltanpuia te phei chu Mizoram sawrkar prog-ramme, SEDP Board Vice Chairman an ni tih pawh sawiin, “Office leh Staff hran pek vek an nih bakah, Motor 2 Board tin tan pek an ni a. Heng Board Vice Chairman te hian MLA an nihna piah lamah, Board Vice Chairman an nihna denchhenin TA/DA Class-I Officer te Entitle ang pek niin, Minister of State Rank-ah dah an ni bawk a ni,” tiin hei vang hian Complain hi thehlut an nih thu an sawi bawk.