Lenkawl

Mizoram Pradesh Congress Committee (MPCC) chuan nimin khan Aizawl-a Congress Bhawan Golden Hall-ah Old Pension Scheme (OPS) chungchang zirhona an buatsaih a, he hunah hian MPCC President Lalsawta chuan sawrkarna an chang a nih chuan OPS hi hman ngei an tum thu a sawi.

Kumin-a a vawi khatna turin nimin chawhnu lam khan Mizoram-ah tam tham deuhin ruah a sur a, nimin-a ruahsur rual hian Thli leh Rial te thawk bawkin Mamit DC Quarters-a In 3 lai chu thli hian a chung a len chhia a, Tuidam ah In 6 chhiain Tuirum-ah In 2 leh Phuldungsei-ah In pakhat a chhe bawk a ni.

Tun thla ni 29-a Lunglei Municipal Council inthlanna neih tura Candidate te chu nimin khan an Symbol tur pekchhuah an ni a. BJP Candidate te chuan Symbol atan Lotus hmangin Indian National Congress in Kutphah (Hand), Mizo National Front (MNF) in Arsi (Star) leh Zoram People Movement (ZPM) in Ni chhuak (Sun with Rise) te an hmang dawn a ni.

Director General of NCC Lt. Gen. Gurbir Pal Singh chuan nimin khan NCC Directorate NER te tlawhin Aizawl Vanapa Hall-a Cultural Programme leh Meritorious Award semna chu a hmanpui a. NCC te chu Training and Adventure activities te ngai pawimawh tur leh Expedition, Trekking, Parachuting, Para Jump, Skiing ah tel ve a, India ram pum huapah pawh lang thei tura mahni inthunun turin a chah a. Khawtlang tana an thiamna leh theihna te hmang let turin leh midangte puitu leh thalai te tana entawn tlak ni zel turin a chah bawk. Nimin-a he hun hmanna ah hian Mizo Hnam Lam chi hrang hrang entir niin mi 5 hnenah Meritorious Award a hlan nghal bawk a ni.

Mizoram Sawrkar Political and Cabinet Department chuan thuchhuah siamin Chief Minister rawtna angin Mizoram sawrkar-a Minister pahnih te Department chanpui enkawl tih danglam a nih thu an tarlang a. Hemi ang hian R. Lalzirliana enkawl thin District Council & Minority Affairs Department chu Robert Romawia Royte chuan a enkawl tawh dawn a ni. Heti hian Minister R. Lalzirliana hian Power & Electricity, Art & Culture leh Land Resources, Soil & Water Conservation te enkawlin Robert Ro-mawia Royte hianSports & Youth Services, Tourism, Information & Communication Technology leh District Council & Minority Affairs te a enkawl tawh dawn a ni.

Mizoram-ah National Highway atana puan thar kawngpui pahnih a awm.

Mizoram leh Manipur-a Electric hman man bithliahtu Joint Electricity Regulatory Commission (JERC) for Mizoram and Manipur chuan Mizoram Sawrkarin Electric hman man tisang tura a ngen chungchang ah March 22, 2023-a neih turin Public Hearing a ko. Mizoram Sawrkar chuan sawrkar kumthar (2023-2024) atan Electric hman man 3.15% a tisang tura rawtna JERC-ah a thlen a, hemi chungchanga duhlohna nei te chuan a chhan te an sawi theihna turin Public Hearing hi koh a ni a, Mizoram sawrkar pawhin tihsan a duh chhan te a sawi ve dawn bawk a ni. Mizoram sawrkar in tuna rawtna a siam anga a tlang a nih chuan Eng chhit man Unit khat Rs. 7.83 ni mek chu Rs. 8.08 a ni tawh anga, Public Hearing atang hian Eng chhit man hi bithliah a ni dawn a ni.

Governor Hari Babu Kambhampati chuan, “National Education Policy 2020 chu Education Policy kan neih tawh zinga belhchian dawl ber, a ram mipuite mamawh leh mil-a duan a ni,” a ti.

Commerce & Industries Department changtu Minister Dr. R. Lalthangliana chuan nimin khan Zozia Silk & Handloom (Laltanpuii) hnenah National Merit Certificate Award a hlan.

Chief Minister Zoramthanga chuan State lian leh hausa zawk, economy dinhmun tam zawkah leiba zat a tam zel thu sawiin, Mizoram chu State dangte nen khaikhin chuan leiba nei tlem ber te zing ami niin, a aia leiba nei tlem chu Sikkim chauh a awm thu a sawi bawk.

Kum 2023-2024 atan Mizoram State Health Care Scheme hnuaiah inziahluhna hun hawn leh mek a ni a, MSHCS-ah hian Ration Card mil-a inziahluh tur niin Ration Card nei lo te leh Mizoram-a raltlan awm mek te pawh inziahluh theih a ni ang.

Mizoram sawrkar in kumin atana Lo hal hun hnuhnung a bituk chu Vawiin March 15 hi a ni ta a, lo leh huan hal tur nei zawng zawngte chu March 15, 2023 hmaa hal vel tura hriattirna tihchhuah lo ni tawhin Serchhip District-ah pawh thla hmasa khan District Magistrate in khapna thupek a lo tichhuak tawh bawk a ni.

Tun thla ni 29-a Lunglei Municipal Council (LMC) Inthlanna neih tura chuh tuma hming pe te tana inhnuhdawh theih hun chu nimin tlai dar 3:00 khan tawpin inhnukdawk an awm loh avangin Ward 11-ah Candidate 42 an awm dawn ta a. Congress, MNF leh ZPM ten Candidate 11 theuh neiin BJP in 9 an nei dawn a ni.

Special Assistance to States for Capital Investment (SASCI) sum cheng nuai 90 senga laih, Khawzawl District chhung Ngaizawl leh Neihdawn inkalpawhna kawng KM 5 a thui chu nimin khan Health & Family Welfare Board Vice Chairman Dr. ZR Thiamsanga chuan a hawng.

UD&PA Department in Deendayal Antyo-daya Yojana-National Urban Livelihoods Mission (DAY-NULM) hnuaia ni 3 chhung awh tur DAY-NULM Festival-cum-Street Food Festival an buatsaih chu nimin khan Aijal Club Park-ah UD&PA Director H. Lianzela chuan a hawng a. Aizawl City Mission Mangement Unit (CMMU) buatsaih DAY-NULM Exhibition Cum Street Food Festival-ah hian DAY-NULM hnuaia beneficiaries hrang hrang ten an thil siamchhuah hrang hrang te hralh theih turin an phochhuak a. Exhibition stall 21 bakah Food Court 8 siam a ni a, hetah hian DAY-NULM hnuaia Street Food Vendors ten ei tur tuihnai tak tak an siam te an zuar a, naupang tan intih-hlimna buatsaih a ni bawk.

Nimin khan Chief Minister Zoramthanga hovin SEDP Governing Board chu Chief Minister Conference Hall-ah thukhawmin Family Oriented SEDP chungchang an sawiho a. He Meeting-ah hian kum 2022-23 chhunga beneficiary mi 60,000 te hnenah puihna sem chung-changah 2nd Instalment chu a kaihhnawih department te hnenah pek a nih tawh thu tarlan niin beneficiary te hnena kimchang taka pek thuai a nih theih nan kumin March thla ralhma hian buaipui ngai tur ang zawng zawng chu tihfel tura bawhzui nghal nise an ti a. Sawrkar kumthar 2023-24 chhunga SEDP sum hman dan tur sawiho ni bawkin tuna beneficiary thlan tawh bak beneficiary dang thlan dan tur te, puihna sem hun tur leh ngaihtuah tur pawimawh dangte sawiho a ni.

Mizoram Pradesh Youth Congress Committee (MPYCC) chuan Dampa Tiger Protection Force ten thla ruk lai hlawh an lak thei tawh lo chu pawi an tih thu sawiin, Mizoram Sawrkar chu an hlawh a bat sak te a bo a bang awm lova a rang thei ang bera pe nghal turin an phut bawk.

Mizoram Taxi Association chuan nimin khan Chite Inpui-ah hruaitu thlanna neiin he hun hi Transport Minister TJ. Lalnuntluanga chuan khuallian niin a hmanpui a. Minister chuan Taxi Driver-te chu hawihhawm tur leh rinawm chhunzawm zel tura chahin, Taxi hmanga eizawnna chu eizawnna tha tak a la nih zel thu a sawi a. Passenger phur motor an nih angin an motor-te Fitness chungchang ngaipawimawh a, faina leh lirthei enkawl kawngah theihtawp chhuah thin turin a chah bawk. Minister chuan Taxi replace chungchanga Taxi neitute harsatna hriain Sawrkarin vawikhat chauh replace theih thin kha vawihnih replace theih tura hma a lak mek thu a sawi bawk. He hun hi Serchhip atangin pawhin Serchhip Taxi Owners Association hruaitu ten an zuk telpui a ni.

Governor Hari Babu Kambhampati chuan 23 Sector Assam Rifles huaihawta Phawngpui Expedition-a kal thalai rual te chu nimin khan Raj Bhavan-ah a lo lawm.

Nimin khan Governor hovin Hriak atana sawr chi thlai chi te, Be chi hrang hrang (pulses) leh Oil Palm tharchhuah kawnga Mizoram dinhmun thlirhona neih a ni.