Ruang 2949 phurhna atan nuai 311.45 pek a ni tawh

Mizoram sawrkarin khualkhuaa thite ruang phurh man a tumsakna, ‘Assistance for Transportation of Bodies of Deceased Persons within Mizoram’ kaltlangin ruang 2,949 phurhna atan cheng nuai 311.45 pek a ni tawh.
Ruang phurh buaipuitu Social Welfare Department chuan kum 2024 September thla atanga Mizoram sawrkarin khualkhuaa thite ruang phurh man a tum hnuah thla hmasa , August ni 31, 2026 thleng khan ruang 2,949 phurhna atan Rs. 311,45,000 an pechhuak tawh a. Mizoram sawrkar chuan ruang phurhna senso tur hi kum 2024-25, kum 2025-26 leh kum 2026-27 khan budget-ah cheng nuai 500 theuh a dah a ni.

Ruang phurh inkaihhruaina angin, ruang phurh tur chu a thlenna tur km 20 aia hnai lo a ni tur a ni a, km 20 piah lamah chuan tu tan pawh hman theih niin lirthei thlen theih chin a huam a. Ruang phurhna lirthei hman man chu State Transport Authority (STA)-in rate a siam anga bituk a ni a; ruang phurhna man sawrkarin a pek sak hian lirthei pakhat chiah a huam a, lirthei hman (hire) theihah hian lirthei man cheng nuai 17 man aia to a huam lo. Ruang phurhna hlat zawng chhût nan ruang chhuahna atanga a dahna hmun inkar hlat zawng lâk tur a ni a; lirthei thlen lohna khua a nih chuan lirthei thlen theih tàwpna thleng a ni.

Mizoram sawrkar chuan ruang phurhna senso hi online kaltlanga dil theih turin kumin January ni 15 khan online portal 'Ruangphur-GoM' chu a tlangzarh a; google playstore leh app store atanga download theih a ni a. He Portal hi Mizoram State e-Governance Society (MseGS), ICT Department siam a ni a, sawrkar sum-a ruang phurh kalpui mek chu chak zawka kalpui a nih theih nan leh mi tam zawkin awlsam zawk a an chhawr theih nan ruahman a ni.