One Department One Bank kalpui turin inremna ziak
He inremna hi CM Conference Hall-ah Chief Minister Lalduhoma leh Adviser to CM (Finance & Planning) TBC. Lalvenchhunga te hriatpuina a ziah a ni a, Chief Minister Lalduhoma chuan, “Comptroller & Auditor General of India Audit Report-ah sawrkar sum tam tak hi DDO te Account-ah Finance Department hriatpui loh a dah a nih thin thu a lang thin a. Chung account-a sum dah (park) te chanchin hriat tum chuan Finance Department hian Department te a zawt thin a. A duh ang taka a hriat zung zung theih loh changte a awm thin. Chutiang harsatnate kan tihbo a, tha zawka sum endik hna kan thawh theih nan ‘One Department One Bank’ hi kalpui kan tum a ni,” a ti.
Chief Minister chuan Department pariat te nen kalpui phawtin, a tul dan azirin an pek belh zel ang tih a sawi a, “He hmalakna hi sum leh pai enkawlna kawnga hmalakna thar, langtlanga sawrkar sum leh pai enkawlna kawnga min puitu, tha zawka a endik hna (monitoring) kan thawhna tur a ni a. Min thawhpui tura inpeih Bank-te chungah pawh kan lawm hle a ni,” a ti a. Mizoram CD Ratio a hniam bik thu leh rampum chawhrual (National Avarage) kan phak lo hle thu pawh sawiin, “Mizoram chu 55.83% chauh kan la ni. Mizo-ram CD Ratio hi 2028-29 ah chuan 67% tal nih tir kan duh a, kan Bank-ten tan inlak a tul hle a ni,” a ti bawk.
One Department One Bank kalpui tura sawrkarin inremna a ziahpui Bank-te hi State Bank of India, Mizoram Cooperative Apex Bank, Mizoram Rural Bank, Axis Bank, HDFC Bank, ICICI Bank, Union Bank of India leh Indian Overseas Bank te an ni a. Mizoram sawrkar aiawhin Finance Department-a Commissioner & Secretary, Vanlaldina Fanai chuan a hming a ziakin Bank thuneitu theuh ten an hming an ziak bawk a ni.