Mizoram pumah Vote nei thei 8,35,869 an awm
Special Intensive Revision (SIR) 2026 leh nimin-a Final Electoral Roll tlangzarh tak chungchang ah hian nimin khan Mizoram Chief Electoral Officer (CEO), Garima Gupta-i chuan Aijal Club-ah thuthar thehdarhtute kawmin May 14, 2026-a Election Commission of India thupek angin Mizorama District zawng zawngah Electoral Rolls Special Intensive Revision (SIR) 2026 chu May 20, 2026 atangin kalpui tan a nih thu leh Mizoram hi Special Intensive Revision Third Phase-a tel State 16 leh UT 2 zinga pakhat a nih thu a sawi a. SIR tan hma hian Mizoram pumah Vote nei 8,75,068 awmin heng mi zawng zawng te hi Enumeration Form pek vek niin Enumeration Form semchhuah atang hian Form 8,28,906 lakkhawm leh niin Form 46,162 dawn let a ni lo tih a sawi.
Mizoram CEO chuan Special Intensive Revision (SIR) hnuaia Enumeration Phase zawhfel a nih hnu, July 4, 2026 khan Draft Roll tih chhuah a nih thu sawiin, Draft Roll-ah hian Vote nei 8,28,906 an awm thu a sawi a. Electoral Registration Officer (ERO) leh Asst. Electoral Registration Officer (AERO)-te chuan July 4 atanga September 2, 2026 thleng khan Claim leh Objection (Form 6, 7 leh 8) an dawngin heng te hi an chingfel a, hemi bakah hian Enumeration form dawn te chinfel ni bawkin Draft Roll-a Vote nei 8,28,906 atangin mi 39,243 (4.73%) dah belh niin mi 32,280 (3.89%) paih an ni a, Final Roll- ah hian Vote nei thei hi 6,963 (0.84%)-in an pun belh thu a sawi a. Nimin-a Final Electoral Roll tarchhuah takah hian Mizoram pumah Voter 8,35,869 an awm a, chung zinga 4,03,179 chu mipa niin midang 4,32,689 chu hmeichhia an ni a, Third Gender voter pakhat awmin Mizoram pumah Service Voter 4,103 an awm bawk a, heng te hi mipa 4,010 leh hmeichhia 93 an ni.
Mizoram CEO chuan SIR 2026-ah mipui, Political party, NGO leh Media-te thawhhona tha tak avanga lawmthu sawiin, “Election-a thawkte - District Election Officer leh an hnuaia thawk te, ERO, AERO, BLO leh Electoral Roll buatsaihnaa inhnamhnawih zawng zawng te chu SIR, 2026 hlawh-tlinna tura an thawhrimna leh inpeknaah fakawm kan tiin kan chhuang takzet a ni,” a ti a. ERo thutlukna a lung-awi lo tan Final Roll chhuah atanga ni 15 chhungin appeal theih a nih thu a sawi bawk.