Serchhip District-ah Electoral Roll tlangzarhin Bial pathum-ah Vote nei thei 55,268 an awm
Serchhip District-a Assembly Bial pathum te tana Electoral Roll siam thar tlangzarhna hun nimin-a Serchhip DC Meeting Hall-a neih ah District Election Officer leh Bawrhsap, Paul L. Khuma chuan Serchhip District-ah buaina leh harsatna lutuk awm lova Special Intensive Revision (SIR) 2026 tluang taka zawhfel a ni ta chu lawmawm a tih thu sawiin, hemi atana thawktu hrang hrang te chungah lawmthu a sawi a. Tun tuma SIR kalpui a nih dan tlangpui sawiin, a tir lama Enumeration Form semchhuah a nih avangin Serchhip District chu District hrang hrangte zingah a hma hruaitu an nih chhoh deuh zel thu sawiin,, “ERO, AERO, BLO, Political Party leh BLA, tlawmngai pawl leh mipuite kan vaia kan thawhhona vang a ni,” a ti a. Serchhip District-a Electoral Roll dinhmun tlangpui tarlangin, Electoral Roll thar hi a tlangzarh a, Political Party te a sem nghal bawk.
He hunah hian Serchhip Election Officer, Lalchhanhimi chuan Electoral Roll thar buatsaihna atana Serchhip District-a Assembly Constituency pathum - 26-Serchhip (ST) AC, 27-Tuikum (ST) AC leh 28-Hrangturzo (ST) AC-ah te Special Intensive Revision (SIR) kalpui dan leh hmalakna hrang hrang a tarlang a. July 4, 2026 khan Draft Electoral Roll tarchhuah a nih thu sawiin, siamthat/chinfel ngai chinfelna 'Claims & Objection' hun hawn nghal niin, District chhunga Polling Station 88-ah te July ni 22 atanga August 10, 2026 chhung khan Hearing neih a ni a; Discripency leh No-Maping case 7054 bakah inziahluh thar dilna te, siamthat leh tihdik ngai chi hrang hrangte chinfel niin, Vote nei 1,462 belh an nih laiin mi 726 paih an ni thung. A pumpuia voter punna zat hi 736 (1.36%) niin heng zinga 406 chu mipa an ni a, hmeichhia 330 an ni bawk.
Serchhip District Final Electoral Roll-a tarlan a nih danin Serchhip District pumah Vote nei 54,916 awmin heng zinga 26,496 te chu mipa niin hmeichhia 28,420 an awm bawk a, Serchhip District-a Assembly Bial pathum zingah 26-Serchhip (ST) AC-ah Vote nei mi 20,979 awmin an tam ber a, 27-Tuikum (ST) AC-ah Vote nei mi 17,251 leh 28-Hrangturzo (ST)AC-ah Vote nei 16,686 te an awm a. Heng bakah hian Service Voters mipa 346 leh hmeichhia 6, an vaiin mi 352 an awm bawk a ni.
Serchhip District-a Polling Station 88 zingah 20-Serchhip-X (Chanmari Veng) chu Vote nei tamna ber niin Vote nei mipa 451 leh hmeichhia 549, an vaiin mi 1000 an awm mek a, 10-Chhuanthar Tlangnuam-II in dawtin Vote nei mipa 457 leh hmeichhia 506, an vaiin 963 an awm a. 31-Vanchengte Polling Station chu Vote nei thei tlemna ber niin Vote nei mipa 44 leh hmeichhia 56, an vaiin mi 100 an awm a, 13-Buhkangkawn chuan dawtin Vote nei mipa 41 leh hmeichhia 67, an vaiin 108 an awm bawk a ni.