Chief Minister-in Mizoram chu Digital State-a siam a duh thu leh a tum bawk thu a sawi
Chief Minister Lalduhoma hian nimin khan Aizawl-a Administrative Training Institute (ATI)-ah ATI Office Application thar- Smart ATI App te, Smart Classroom leh Digital Learning Laboratory-te hawngin hemi puala hun hman ah Chief Minister Lalduhoma chuan, “Internet hmang tangkai zawnga hmalakna kan uar chho zel a. Digital lama hmasawnnain khawvel min tuam lai a ni a, awlsamna tam tak min thlen mek a. Keini pawhin kan hman uar tial tial hi a tul a ni. Ka mimal Vision-ah phei chuan Mizoram hi Digital State-a siam ka duh a, ka tum bawk a ni,” a ti a. Digital State ni tur hian a hranpa takin Mission emaw, Scheme emaw nei rih lo mah ila thil tih theih nia a hriat thu sawiin, “Mipui kan la tlem a, ziak leh chhiar thiam kan tam a. Nih theihna remchang kan ngah a ni,” a ti a. “Kan sawrkar hnua ICT Department kaltlanga portal thar kan siam hi siam zawh tawh kan hman mek Portal 19, hman mai theiha zawhfel thawkhat tawh 4, siam mek 7, hmalak mekna 6, an vaiin portal 36 kan nei tawh a. Firm dang nena kan siam zawng zawngte nen phei chuan a tam ve tawh viau ang. e-office kan kalpui mek hi Office zawng zawngah hmang bawk ila, kan fel deuh duak mai dawn a ni,” a ti bawk.
Heng service delivery system tharte hi a taka hmang turin a thawktute lam kan lo tahhriam ve zel a ngaih thu pawh Chief Minister chuan sawiin, “Chu hna chu ATI mawhphurhna pawimawh tak zinga mi a ni. Group A atanga Group C thlengin Training chi hrang hrang in pe a. A lut tharte tana training te, a thawk mekte tana training-te bakah tunlai thiamna thar hman dan thlengin training in pe a. He Institute hi a that poh leh kan trainee ten an hlawkpui dawn tihna a ni,” a ti a. “Sawrkar hnathawkte capacity building hi kan ngaipawimawh tial tial dawn a. Chu hna kan thawhna hmun chu ATI hi a nih avangin Institute changkang tak nihtir a, Technology thar ber ber hmanga thuam chhoh zel hi kan tum tlat a ni,” a ti bawk.
He hunah hian MSeGS Project Manager, Isaac Zothanpuia chuan Technical Report pe in Digital Service thar an hawnte hi ATI Training Programme-te hmuh theihna, Registration tih theihna leh Training chungchang Information an dawnna tur platform a ni tih a sawi a. He App atang hian Course Material leh Training Certificate-te pawh pek a ni tawh dawn a. Training Catalogue, Course Information, Eligibility, Application Status, Notification, Attendance leh Training History thlengin digital-a vawn leh enkawl vekna tur a ni. User-ten an Bio-data leh Service Details vawikhat an register tawh chuan an hmang nawn zel thei tawh dawn a ni. Hei bakah hian Mission Karmayogi kalphung angin Digital Learning Laboratory (DLL) pawh DoPT atanga sum hmuh cheng nuai 67.19 hmangin din a ni tawh a. ATI Officer leh Faculty-ten Mizo tawng in Training Course 6 lai in record tawh a.DoPT lam pawhin rawn pawmpui tawh a ni.