Midangte tana thih hnua Mit pe tura inzirtirna kumtin-a neih thin, ‘Eye Donation Fortnight’ chu India rama a vawi 41-na atan hman leh mek a ni a, nimin khan Aizawl-a Taxation Department Auditorium-ah hemi pual hian hun hman niin H&FW Department Principal Director Dr. Lalthlengliani chuan khuallian niin a hmanpui a. Eye donation chu kan thih hnua kan mit darthlalang (Cornea) midangte tana mit varna a lo nih theihna tura pek a nih thu sawiin, Mizoram-ah pawh July ni 31, 2008-ah Eye Bank hawngin September ni 25, 2009-ah Corneal Transplant hmasa ber chu hlawhtling taka neih a nih thu a sawi bawk.
He huna tarlan a nih danin Civil Hospital, Aizawl-a Mizoram Eye Bank-ah hian mit donate tuma in-register mi 9312 awm tawhin Mit dawng tura in-register mi 400 an awm tawh bawk a. Thih hnua Mit pe mi 632 awmin kumin a National Fortnight on Eye Donation hun chhunga Mit donate phal, Pledge chhang zawng zawng nen chuan mi (9312+33) 9345 an awm tawh a; mit donate, pledge chhang duh hi mi 20 chin an awm chuan a hmunah thawktu ten an pan thei reng a ni.
