Mizoram-ah kawlphetha chhit man tihsan ni lovin subsidy-ah sawrkar in thla tin vbc. 16.43 a seng dawn

Kumthar 2024-2025 chhunga Mizoram Eng chhit man tur chu Joint Electricity Commission for Manipur & Mizoram chuan bithliah felin chawhrualin mipui ten kawlphetha hman man hi Unit khat-ah Rs. 8 zel an chawi dawn a, Eng chhitman tihsan a nih loh avangin sawrkar chuan thla tin Subsidy cheng vbc. 16.43 a tum a ngai dawn a ni.

P&E Department-in Financial Year 2024-25 chhung atana Mizoram-a kawlphetha man (rate) a hman tur ah hian Aggregate Revenue Requirement (ARR) leh Tariff bithliah sak tura an dilna chungchang hi kumin March 13 khan Mizoram State Advisory Committee Meeting-ah sawiho niin Tariff Petition chungchangah hian March 14, 2024 khan Aijal Club-ah Public Hearing neih leh a ni a. Hun bituk chhunga rawtna leh sawiselna siam awmchhun thu thlen leh P&E Department-in an chhanna te ngaihthlak a ni. P&E Department hian kum 2024-25 chhunga Power Supply enkawl nana Revenue sum mamawh (ARR) cheng vbc. 781.97 bituk sak turin Commission an dil a, hemi hmuchhuak turin sawrkar kum 2023-24 chhunga Tariff hi tisang lova Sawrkar kum 2024-25 a hman chhunzawmin, sum mamawh hmuh phak lohna chu Mizoram Sawrkarin subsidy cheng vbc. 211.23 emaw, Commission-in ARR a bituk sak atanga 27.01% emaw, heta a tlem zawk zawk hian a phuhruk sak dawn tih an sawi a ni.

P&E Department chuan kumthar (FY 2024-25) chhunga Consumer te Eng pek nan Unit khat zelah Rs.11.83 mamawh tura an insawi laiin Commission chuan ARR a bituk sak atanga chhutin an mamawh hi Unit khat zelah Rs.11.61 ni turin a ti a. Rs.11.61 hi Subsidy tel lova chawhruala Unit khat zel man tur, Full Cost Tariff (FCT) niin, sawrkar-in Subsidy a pek loh chuan FCT hi hman tur a ni a. Subsidy cheng vbc. 197.23 hi sawrkar in advance-in thla tin cheng vbc. 16.43 a pe tur a ni, a pek loh chuan FCT hmangin Bill siam tur a ni. Sawrkar-in subsidy a pek sak chuan tlawm zawkin mipui hnenah chawhrualin Unit khat man Rs.8.00 vel zelin an pe thei dawn a, Sawrkar-in Unit khat-ah Subsidy Rs.3.61 vel a pe dawn a ni.

An dil ang chuan Eng chhit man thar tur hi chawhrualin Unit khat man Rs. 11.83 ang vel tur a ni a. JERC hian P&E Department sum mamawhna te a zirchian hnuin ARR atan cheng vbc. 730.20 a bituk sak a, hei hi kawlphetha hralhna atanga hmuhchuah tur niin Commission chhut danin Tariff kan hman lai mek hmanga Mizoram-a chhunga power hralhna atangin kumthar 2024-25 ah hian cheng vbc. 437.41 leh kawlphetha hman bang ram pawna hralhna atangin cheng vbc. 95.56 an hmuh theih beisei a ni a, hei hi a vaiin cheng vbc. 532.97 a ni. Hei hian cheng vbc. 197.23 (i.e, 730.20 – 532.97=197.23)-in ARR a phuhru zo lo a. Nimahsela, sawrkarin subsidy cheng vbc. 197.23 pe-in a phuhruk sak theih dawn avangin Tariff tihsan a ni lova, Tariff hman laia Eng chhit man rate hrang hrang te hi kum 2024-25 atan hmang leh turin Commission-in thutlukna a siam ta a. Tariff Order thar hi March 15, 2024 khan siam niin April 1, 2024 atanga hman tur a ni ang.

Kum thar 2024-25 chhunga Mizoram-a consumer te kawlphetha hman zat tur hi 546.79 MU ni tura chhut niin Consumer te hnen atangin Revenue cheng vbc. 437.41 hmu thei turin beisei a ni thung a, kum 2023-24 aiin 2024-25 chhunga kawlphetha hman zat a tam dawn avangin Tariff hi tihsan ni lo mah se kum thar-a sum hmuh tur hi a hma aiin cheng vbc. 63.50-in a tam a ni. 

Kum 2024-25 hian Mizoram pumah Consumer hi 3,34,207 awm tura chhut a ni a. Tuna kawlphetha kan hman thin dan anga chhut chuan, Domestic Consumer zawng zawng 2,88,234 zinga consumer 1,56,055 hian thla khat chhungin Unit 60 vel hmang tura chhut a ni a, Unit 120 vel hmang chhungkua 65,603 leh Unit 200 hmang pel hi 47,335 awm tura chhut a ni. KJ consumers chhungkua 19,229 leh HT (High Tension) domestic consumer 12 awm tura chhut a ni bawk.