Serchhip-a buhfai dah tur Motor a chesual

Serchhip-a Supply Kudam-a buhfai dah tur phurtu truck pakhat chu nizan hmasa khan Chhiahtlang leh Chhingchhip inkar-ah chesualin kawngthlangah a tlanliam a, vanneihthlak takin mihring nunna chan an awm lo.

Thudawn danin buhfai phurtu Truck MZ-01P-4484 hi Supply Department Motor niin tunhnaia Serchhip Kudam-a Weighbridge chhia siamthat enfiahna tur buk lung kg. 50 zela rit za (100) rawn phurin hemi rual hian buhfai quintal 90 a rawn phur bawk a. Nizan hmasa dar 8:10 vel khan Chhingchhip lam atanga Chhiahtlang thlen hma, Lamchhip peng atanga Chhingchhip lam Km khat velah kawng kual-ah kual zo lovin kawngthlang ah a tlanliam a, he Motor-ah hian a khalhtu Lalrinfela leh Handyman Lallawmawma te chiah an chuang a, Lallawmawma hian hliam tuarin ngaihtuahawm erawh a ni lo nia thudawn a ni.

Vanduaina thlenna hmun hi nizan hmasa khan Chhiahtlang-a mi thahnem tak te chuan thleng nghalin thil bo thei te senghawi hna an thawk zui nghal a, nimin khan Chhiahtlang Hmar Veng, Zotuithiang leh Chanmari Branch YMA te chuan VC te kaihhruaina hnuaiah buhfai leh a thil phurh dang te lakchhuah hna hi an thawk nghal a, buhfai bakah buklung a rawn phurh te pawh hi an vaiin an lachhuak thei tih Supply Department hotute chuan LENKAWL an hrilh a, tlawmngaia thawkchhuak te chungah lawmthu an sawi bawk a ni.