Chief Minister in Mizoram-a raltlante chungchang Sawrkar laipui hotute a sawipui thu a sawi

Mizoram Chief Minister Lalduhoma chu Chief Minister a nih hnua a hmasa ber atan kar hmasa khan Delhi-ah kalin Prime Minister leh Union Home Minister te a kawmna ah Mizoram-a Mizote unau raltlan lo lutte aiin dan lova Mizoram pawn atanga lo lut reng thinte chungchang ngaihtuah a tul zawk thu a thlen tih a sawi.

Chief Minister Lalduhoma hian Delhi a tlawh hnuah Inrinni khan Aizawl rawn thlengin CM Conference Hall-ah thuthar thehdarhtute a kawm nghal a, Chief Minister a nih hnua sawrkar laipui dawra a kal tum khatnaah Mizoram in a buaipui Myanmar leh Manipur State atanga raltlan chungchang hotute sawipuiin Raltlante chhawmdawl hna chu Official a kalpui theih a lo nih loh thu a sawi a. “India sawrkar chu 1951 UN Refugee Convention-ah Signatory a ni loh avangin tumah Refugee angin India in a en thei lo a ni,” a ti a, Myanmar raltlante chu Refugee Status pe chuang lovin a enkawlna ah erawh theihtawp a thawhho theih a nih thu sawiin, Central sawrkar leh State sawrkar in resource a neih ang ang te an ni tan hian hman a ni dawn a ti a, central sorkar pawhin a thlahthlam dawn lova, lungngaih em em tur a awm lo, a ti bawk.

Chief Minister Lalduhoma chuan Myanmar atanga raltlan te hi chhinchhiahna bik- Biometric Identification siamsak turin Home Ministry in a lo nawr tawh thu leh sawrkar hmasa pawhin engemaw chen kalpui tawhin hmalak a lo ni tawh a, hemi chungchang hi ngaihthiamloh tur a awm lo tih sawiin, Foreigner reng reng India rama lo lut zawng zawng te chu Biometric Identification neih tir vek tur a ni a, India ram pumpuia hman tur a nih avangin Mizoram bik chauhin tih loh lo dil kha a harsat thu a sawi a. India chuan dan loa lo lut, citizenship nei ta mai te tihtawp a nih theih nan a hmalakna a nih avanga hrethiam tura an ngen thu a sawi a. Union Home Minister chuan he thil hi Mizoram a raltlan te thawn haw nana hman a ni dawn lo a, thlamuang taka lo awm turin a chah tih a sawi a, an ram a buai chhung chuan thawn haw an ni dawn lo tih Home Minister hian a hrilh thu leh anmahni tan bik pawh Chhinchhiahna portal hran hmanga chhinchhiah tura ruahmanna siamsak an ni dawn tih a sawi bawk.

Chief Minister chuan Myanmar leh Manipur atanga rawn kal te ai chuan ILP hnuaia Mizorama pawn lam mi lo lut te chu an ngaih-mawhawm zawk tih sawiin, dan lova rawn lut te'n Mizoram-ah permit an la a, hnamdang lo lut an tam lutuk tawh avangin he thil hi vil ngun a ngai hle a ni, a ti a. Prime Minister leh Home Minister hnenah pawh dan lova lo lut te tan hian Biometric Indentification hman zawk turin rawtna a siam thu a sawi bawk.

Central sawrkarin Myanmar leh Mizoram inkarah Border fencing dah a tum tih a zuk hriat thu sawiin Chief Minister chuan, Ministry hmasa zawkin Tiau dunga Border Fencing neih an lo rawt a, hei hi anni chuan an pawm dawn lo tih a sawi a. Boundary awmsa chu barhluih ramri a ni a, engtik ni ah emaw chuan Zofate chu rorelna pakhatah an la awm ang tih thlirtu ZPM tan pawm chi a ni lova, an Greater Mizoram Policy nen a in kalh niin a sawi.

Chief Minister chuan Union Road Transport & Highway Minister hnenah NHIDCL-in ram Environment a tihchhiat dan a thlen tih pawh sawiin, “Tun anga an tal hi kan sawrkarah chuan kan remti dawn lo a ni,” a ti a. Mau chungchang sawi bawkin, “Mau hriak sawrna din tumin hma kan la mek a, kan ram Mau zinga zaa pali (4%) hi Mamit District-a awm a ni a, hetah hian bultan kan tum a. Bairabi-ah ram kan hual tawh a, kan ram Maute hi a nih ang anga hman tangkai dan kan dap dawn a ni,” a ti bawk.

Chief Minister Lalduhoma hian Chief Minister a nih hnua Delhi a zinna hmasa berah hian Prime Minister leh Union Home Minister bakah Union Minister dang leh British High Commission houtute a kawm a, Inrinni khan Mizoram a rawn thleng leh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar