Halpuah leh halmawi lam chi khap bur a ni dawn

Krismas, Kumthar leh Puja lo thleng turah Halpuah, Halmawi, Silailem mu nei chi leh Sky Lantern te chu mihring hriselna atana thil pawi thei leh COVID-19 hri len lai phei chuan nghawng thalo tak nei thei a nih avangin khap leh a ni dawn.

Nimin khan Aizawl-a Police Hqrs. ah Chief Secretary Lalnunmawia Chuaungo hovin kumin Krismas, Kumthar leh Puja (Dusshera, Diwali leh a dangte) lo thleng turah Halpuah, Halmawi, Silailem Mu nei chi leh Sky Lantern te khap chungchang hi Sawrkar mi pawimawhte leh tlawmngai pawl hruaituten an rel a. Heng hal theih hrang hrangte hi mihring hriselna atana thil pawi thei leh COVID-19 hri len lai phei chuan nghawng thalo tak nei thei a nih avangin khap tlat nise, an ti a. Khapna thupek hi a rang thei ang bera tihchhuah tura rel niin, Dan anga khapna thupek tihchhuah a nih veleh Addl. SP Aizawl kaihhruaina hnuaia din Special Cell te chuan hma an la tan nghal dawn a. Chutiang bawkin, veng hrang hrangah tlawmngai pawl te leh Local Council te pawhin anmahni zawn theuhah hma an la nghal dawn a ni.

He thutkhawm ah hian Chief Secretary Lalnunmawia Chuaungo chuan kumin-ah hian heng khapna chungchangah hian ngawrh leh zualin hmalak a ni dawn tih sawiin, Halpuah leh halmawi chi hrang hrangin boruak a tihchhiat avangin Kutpui hunlaiin Awmna, Khuh, Chuap lam khawih natna a pung hluai thin tih Medical thiamna chuan a nemnghet tawh a, COVID-19 nasa taka a len mek lai a nih avangin mipui hrisel nan khawng leh zuala khapna kalpui tul a tih thu a sawi bawk.

Meeting hian Halpuah, halmawi leh a dangte mihring hriselna atana a pawizia inzirtirna leh hal lo tura mipui thinlung hneh tura campaign uar lehzuala kalpui ni se tiin Veng tina Information mike te, Print leh Electronic Media te leh Social Media kaltlangin Awareness Campaign kalpui tum a ni a. Sumdawng te mai bakah mimal leh chhungkaw tin te chu heng halpuah, halmawi, sky lantern leh silailem mu kapchhuak theite hi chah lo turin ngen an ni a; lo chah ru emaw, zuar an awm a nih chuan Dan angin hrem an ni dawn a ni.

Assam Rifles, BRTF, BSF leh sipai hmunah halpuah an hal lohna turin khapna order pek nise tih a ni bawk a, Mizoram ramri-a Check Gate awm zawng zawngah uluk lehzuala lirthei lo lut endik tur te, sumdawnna hmun leh Kudam te a tul dan a zira endik/check te leh Police te bakah tlawmngai pawl ten hunpui laiin duty tur insiam leh ni se tih te an rel a ni.

He hunah hian kum kaltaa khapna kalpui a nih dan thlirlet niin Krismas leh Kumthar bawra dan bawhchhia mi 22 case siam sak niin an zinga 7 chu hrem (convict) an ni tawh a, court case kal lai mek 15 a la awm a ni.