ZMC-ah khum 10 awmna ICU Ward thar hawn a ni

Dedicated COVID Hospital, Zoram Medical College (DCH-ZMC)-a khum 10 awmna Intensive Care Unit (ICU) Ward thar chu nimin khan Health Minister Dr. R. Lalthangliana chuan a hawng.

ZMC-a Lecture Theatre-I a ICU Ward thar hawn puala inkhawm buatsaihah Health Minister chuan COVID-19 hripui thawhkhatna-ah khan Pathian venhimna leh kan tanrualna azarah kan tuar na lova, tunah erawh kan dinhmun sawi ngai lovin kan hre vek tih sawiin, “First Wave laia kan fimkhur ang khan mimal tinin mahni hmun theuhah tan kan lak thar theuh a tul hle a ni,” a ti.

COVID-19 First Wave-ah ICU khum 12 neiin Second Wave atana theihtawpa kan inpuahchahna ah khum 21 siam belhin khum 34 kan nei ta tih Health Minister chuan sawiin, amaherawh chu kan dinhmun heti a nih takah hian ICU khum kan indaih lova, nitin nunna chan leh damlo serious an pun tak zel avangin hmanhmawh takin ICU khum 10 dah belh turin tan an lak thu leh Nurse 50 lak belh an rawt thu a sawi a. ICU peihfel ruala Nurse te luh tir a ngaih tawh avangin Written Exam tihna hman pawh a awm lo a ni, a ti a. Interview Board panga (5) siamin Board tinah hian DP&AR, Nursing Council leh Doctor aiawh mi pakhat theuh awmin, ni 4 chhung interview hi neih a ni tih a sawi a, “Tihsual palh a lo awm palh a nih pawhin rikrum thil tak meuh meuh a lak an ni tih min hriatsak ula, tihsual palhah min hriatthiam kan dil tak meuh a ni,” a ti.

Minister chuan ICU-a thawk tur Specialist Doctor pawh sawrkar in pathum lak a phalsak leh tih sawiin, ICU-a duty Doctor te an lo positive ve chang a awm hian a thlakna turah an mangan thin thu leh tunah chuan an zia deuh a beiseiawm tih a sawi a. ICU atana thilpek petute chungah lawmthu sawiin, LG Company-in A/C leh Fan thahnem tak pein, hun hmasa lamah Oxygen indaihlohna nasa tak kan neih avangin thla 2 chhung chu FK Oxygen Plant ten an awi thu a sawi bawk.

ZMC-a ICU Ward thar hawn hi tuna ICU leh SICU Ward hman lai mek chungah a awm a, ICU khum pakhat hian 250 sq. feet a awh a, LG Company in an pek A/C dah vek niin, donning/doffing area a awm bawk a, ICU khum tinah hian Air Mattress dah vek niin, Oxygen Plant atangin Oxygen Pipeline thlunzawm veka ni bawk. Japan sawrkarin Ministry of Health & Family Welfare kaltlanga a rawn pek Phillips Ventilator tha chi vuah vek ni bawkin, Cardiac Monitor dah vek a ni a, infusion/syringe pump 30 awmin, Suction Machine vuah vek a ni bawk a, heng bakah hmanraw dang neuh neuhte nen ICU khum pakhat hian cheng nuai 5 vel hu a keng tel theuh a ni. ICU buatsaih nan hian Mizoram sawrkar chuan cheng nuai 39 a seng bawk a ni.