Latest News

Chanchin thar thenkhat :

Zirlaite Smart Phone sem

Lunglei District Bawrhsap Kulothungan A IAS hmalakna in nimin khan CSR kaltlangin BPL leh AAY chhungkua-a zirlai, Smartphone nei lo te hman tur Intel A26 Smartphone chu MSU, Regional Hqrs, Lunglei kaltlangin sem a ni a. Heng Smartphone leina atan hian Engineering Project India Limited (EPIL)-a Project Manager, Rajiv Bora chuan CSR kaltlangin cheng nuai thum a rawn pe a, hemi hmang hian Phone 46 leiin nimin khan semchhuah a ni. Smart Phone semna hunah hian Lunglei DC chuan COVID-19 hri leng avangin hun rei tak zirlai ten class an kal thei lova, Online Class kal a ngaih tak avangin Lunglei District chhunga zirlai harsa ten Smart Phone hmanga Online Class an kal thei tur chu lawmawm a tih thu a sawi a ni.


Inthlanna neih tur thlirho

Tuirial Bial-a Assembly bye-election neih tur atana inpuahchahna kal zelah nimin khan he inthlanna a General Observer Mohammed Ali Shihab IAS hovin MPF Kolasib District hruaitute leh Candidate leh an Agent-te bakah Sectoral Magistrate ten Model Code of Conduct leh hri lak a him inthlanna thianghlim leh felfai kalpui dan tur chungchangah thutkhawm an nei a. He hunah hian General Observer chuan Mizoram chu State ralmuang tia hriat a nih angin inthlanna pawh boruak ralmuang tak hnuaia kalpui a nih ngei a beisei thu sawiin, Sawrkara thawktute leh NGO hrang hrangte inthlanna felfai a awm theih nana an thawhhona chu lawmawm a tih thu a sawi bawk.


Lunglei Bazar-ah ruang chhar

Nimin chawhnu dar 2:00 vel khan Lunglei Sobji Bazar-a inthiarna chhungah ruang pakhat hmuh a ni a, Police ten an enfiah hnuah Zorem-siama (43), Zobawk Vengthar a ni tih hriat a ni. Thudawn danin he inthiarna hi Bazar-a thu ten hman tumin chhung lamah a inkalh reng a, a hnu ah pawnlam atang hian ko mah se chhangtu an awm loh avangin Police te punin kawngkhar an tihchhiat hnuah ruang hi hmuh a ni.


Nomination paper pawm vek

Tun thla ni 30-a Tuirial Bial Assembly bye-election neih tur atana Nomination Paper thehluh te chu nimin khan enfiah a nih hnuah hnawl awm lovin pawm vek a ni a, tarlan tawh angin he inthlan chuh tur hian mi 4 in Nomination an file a, BJP atangin K. Laldinthara, Indian National Congress (INC) atangin Chalrosanga Ralte, MNF Party atangin Laldawngliana leh ZPM Party atangin Laltlanmawia te niin heng mite Nomination Paper pawm a nih hnu hian inhnukdawk duh tan naktuk, Oct. 13, 2021 thleng hian hun hawn leh a ni dawn a ni. Hetihlai hian he inthlanna neih tur atan hian Political party leh Candidate te hian khaw hrang hrangah ngawrh takin Campaign an kalpui mek a ni.


Lunglei-ah kawng sawiho

Nimin khan Lunglei District Bawrhsap Kulothungan A hovin a Office-ah Lunglei District chhunga kawng dinhmun tlangpui leh a chhe lai te siamtha tura hmalak tul leh chet lak dan tur sawihona neih a ni a. Lunglei District huamchhunga World Bank Road (Aizawl-Thenzawl-Lunglei kawng) hnathawktu Bhavya Constructions te chuan hun rei tak atangin hri leng avanga hnathawk tur mihring an mamawh zat an hmuh theihloh thu leh Fur ruahtui a ziaawm hunah hna hi chak zawka thawh theih anih tur thu an sawi a. NH 302 - Lunglei (3-Gate) atanga Tlabung kawng siam hna thawktu SRK Construction Projects Pvt. Ltd. in chak zawka hna an kalpui theih dan turte pawh sawiho a ni.

Comments

Chhiar Hlawhte