MSU leh ZMC Staff leh Joining Report pe tur dang

Tun thla ni 4-a Staff Nurse mi 50 lak chung-changah thil fello a awm avangin Mizo Students’ Union (MSU) General Hqrs. chuan nimin khan ZMC Administrative Staff leh Joining Report pe turte a dang a. Sawrkarin chak zawka thil tisualtu zawnchhuah intiamna a neih avang leh Volunteer te tan duhsakna tha zawk a pek turte ngun taka ngaihtuah a nih hnuah nimin tlai dar 3:00 khan pungkhawm hi an tin thu MSU chuan an sawi.

MSU chuan hetiang thil hi a thlen tawh loh nan sawrkar nen inremna an siam thu sawiin, he an inremna ah hian Interview-a tel lo tling anga tarlan lo awm avangin Interview Board zingah emaw hetiang titu hi chhui chhuaha dan anga hrem ngei tur a nih thu te; Voluntary Nurse-te vau thintu chu darkar 24 chhungin dan angin thunun a, a tul anga hrem tur te; Nurse lak thar zingah Joining Report pe tura kohte hian ni 20 chhunga lehkha pawimawh thehluh ngai an pe thei lo a nih chuan an aiah Panel list-a mi lak tur a nih thu te; ZMC-a thawk tur Nurse 34 lak turah ZMC-a Covid Voluntary Nurse-te senior dan indawta a rem chin chinah duhsak dan zawn ni se, Seniority hi Central sawrkar sawi angin ni 100 aia rei service tawhte chauh an ni tur a nih thu leh Health & Family Welfare Department hnuaia Staff Nurse 50 lak turah Mizoram hmun hrang hranga Covid Voluntary Nurse dik takte duhsak an nih theih nan hmalak a ni ang tih te a nih thu an sawi bawk.

Hetihlai hian PC Party Thalaite chuan nimin khan thuchhuah siamin Mizoram sawrkar in ZMC-a thawk tur Staff Nurse Post 50 a lak danah thil fello leh dikhlel tak a awm ngei tih Political Party leh pawl hrang hrangte'n auchhuah-puiin, siamtha leh ngei tura sawrkara ngenna thlen in bengkhawn a hlawh tawk loh avanga MSU te umzuina chu an thlawp thu an tarlang a ni.