Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Pathianni-ah hri kai 307 hmuh belh an ni

Pathianni khan Mizoram-ah Sample 1246 enfiah niin heng atang hian COVID-19 hri kai mi 307 hmuhchhuah an ni a, hri kai hmuhchhuah hi tlem mah se Sample enfiaha tanga chhut chuan za zela 24.64 in hri an kai a ni.

Pathianni khan ZMC-ah Sample enfiah awm lovin Fluorescent Immunoassay Test hmangin Sample enfiah a awm lo bawk a. District hrang hranga TrueNat Laboratory zingah Aizawl District-ah chiah Sample enfiah awmin Sample enfiah 4 te chuan hri an kai vek a, an vai hian Aizawl khawpui chhung ami te vek an ni.

Rapid Antigen Test hmangin niminpiah khan Mizoram-ah Sample 1242 enfiah niin hri kai 303 hmuh an ni bawk a, an zinga 197 te chu Aizawl District atanga hri kai hmuhchhuah te niin Lunglei District-ah 54, Serchhip District-ah 19, Champhai District-ah 9, Lawngtlai leh Mamit District-ah 7 ve ve, Kolasib District-ah 6, Hnahthial District-ah 3 leh Saitual District-ah hri kai mi pakhat te hmuh an ni bawk.

Nimin khan tlai dar 5:00 thlengin Mizoram-a hri kai te zingah mi 885 te chu enkawl dam an awm belh leh bawk a, heti hian nimin tlai dar 5:00 thlenga Mizoram-a hri kai hmuhchhuah chu 1,06,136 ni tawhin an zinga 92,370 te chu enkawl dam an ni tawh a, hei hi hri kai hmuh tawh atanga chhutin zaa 87.03 niin tunah hian hri kai enkawllai 13,408 an la awm mek a ni.

Hetihlai hian Mizoram-a COVID-19 hri kai te zingah nimin thleng khan boral an la awm belh reng a, nizan hmasa khan zan dar 8:00 hnu lamah hri kai boral mi pahnih awm belhin nimin khan he thu buatsaih lai thleng hian mi pathum an boral leh tawh bawk a. Heti hian Mizoram-a hri kai zingah mi 359 lai an boral tawh a ni.

Comments

Chhiar Hlawhte