MPTA ten Serchhip tiamin Mizoram District pathum-ah raltlan tanpuina an sem

Mizoram Primary Teacher’s Association (MPTA) chuan nimin (Oct. 11, 2021) khan Mizoram-a District pathum ah Myanmar atanga Mizoram-a raltlante tanpuina atan pawisafai leh bungrua hlanin Serchhip-ah pawh Sub-Hqrs. YMA kutah cheng nuai khat leh bungrua thahnem tak hlan a ni.

Heng raltlan tanpuina hlanna puala Inkhawm tawi nimin a Serchhip Sub-Hqrs. YMA Conference Hall-a neih ah MPTA General Hqrs. a General Secretary R. Zonunmawia chuan MPTA General Hqrs. hnuaiah Joint Hqrs. pakhat leh Sub-Hqrs. 18 an nei tih sawiin, tun tumah hian Myanmar nena ramri nei Sub-Hqrs. YMA pathum te hnenah tanpuina Rs. 5,20,000/- hi an hlan thu a sawi a. Champhai Sub-Hqrs. YMA hnenah Rs. 2,70,000/-; Hnahthial Sub-Hqrs. hnen ah Rs. 1,50,000/- leh Serchhip Sub-Hqrs. ah Rs. 1,00,000/- bakah thawmhnaw leh nitin khawsakna a mamawh thil hrang hrang te chu an thil hlan zingah hian a tel thu a sawi a. Chhiat/that a lo thlenin YMA chu mawhphurhna inbela hma la thin an nih avangin an hnenah tanpuina hi hlan an nih thu a sawi bawk.

Nimin-a tanpuina inhlanna hunah hian MPTA General Hqrs. leh MPTA Sub-Hqrs. Serchhip hruaitute telin Serchhip Sub-Hqrs. YMA hian an Vice President, Lalrammawia hovin an lo dawngsawng a, he hunah hian Serchhip Sub-Hqrs. YMA Secretary PC. Vanlalluna chuan Serchhip Sub-Hqrs. YMA in an huamchhunga Myanmar atanga raltlan te an lo dawnsawn dan leh an buaipui dan te sawilangin, tunah hian an huamchhunga Branch 14-ah raltlan mi 190 vel an rawn luh tawh thu a sawi a ni.

Serchhip Sub-Hqrs. YMA hian Myanmar atanga raltlan te tanpuina atan hian Serchhip Town chhung leh Direct-a awp Branch ah te tanpuina khawn mek bawkin nimin thleng khan Branch 20 atangin tanpuina pawisa leh bungrua thahnem tak a lut tawh a ni. Tunhnaia Serchhip a raltlan rawn lut chhungkaw pakhat chu an dinhmun en a tanpui nghal ngai an nih avangin nimin vek khan Serchhip Sub-Hqrs. YMA hian Rs. 2000/- leh Buhfai bag khat an hlan nghal bawk.

@@@@@