Mizoram-ah Dengue vei thar an tlahniam tan; Dengue vanga thi mni 5 an tling tawh

Tunhnaia Mizoram-a natna rawn hluar thar tak Dengue vei thar chu an tlahniam ve hret hret zel niin a lang a, kumin chhung hian Dengue vei mi 1,397 hmuhchhuah ni tawhin he natna vang hian kumin chhungah mi panga in nunna an chân tawh a, nakum Fur laiin he hri hi a rawn hluar leh rin a ni.

Health Department-a thawktute sawi danin Dengue hri hluar hian Fur a reh chhoh tan avangin ziaawm lam a pan chho zel a, hetihlai hian vei thar erawh an la awm reng thung a, he hri vei/kai thar hi a ziaawm chho zel turah an beisei tih sawiin, Thal a nih chhoh tan avanga Thosi tui theihna hmun a tlem avangin Dengue chu ziaawm tan a ni tih sawiin, nakum Fur-ah a pung leh dawn niin an sawi bawk. Health Department chhinchhiah danin kumin chhung ringawt hian Mizoram-ah Dengue kai 1,397 hmuhchhuah a ni a, heng zinga a tam ber 91.76% hi Aizawl-a hmuhchhuah a ni tih an sawi a. Elisa Test chauh he hri kai hmuh nan hian pawm a nih avangin hri kai hi hei aia tam an awm thei niin an sawi bawk. Dengue natna avang hian kumdangah thi an awm hriat a ni lo a, kumin ah erawh chuan he natna thihpui mi panga lai an awm tawh thung a. Dengue thihpui hi Aizawl khawpui chhunga mi vek an ni. Kumin bikah January atanga November thla tawp thleng khan Mizoram-ah Dengue natna vei nia rinhlelh thisen 4,155 test a ni tawh a, heng zinga 1,397 hian hri an vei tih finfiah a ni a. November thla bul atanga ni 20 inkar chhung khan Dengue vei thar mi 365 hmuhchhuah niin October thla chhung khan he natna vei hi mi 565 hmuhchhuah a ni bawk.

Dengue hi natna chi khat virus in a thlen a ni a. He natna hrik (virus) hi Thosi in a pudarh thin a, chuvangin Thosi seh atanga inkaichhawn theih a ni. Dengue natna thehdarhtu Thosi hi Thosi chi khat, Aedes aegypti (a dum leh a var tial rik rek), Mizoten ‘Thosi rang’ kan tih hi a ni. Aedes thosi te hian vawi khat Dengue hrik a pai tawh chuan a damchhungin a pai reng a, a seh apiang ten Dengue natna an kai thin. Malaria thlentu Thosi te anglo takin Aedes Thosi te hian chhun khaw en laiin mi an seh deuh ber thin a ni.

Dengue hi chi hnih a then niin Dengue Fever leh Dengue Haemorrhagic Fever te an ni a. Aedes thosi in mihring a seh atanga ni 5 – 6 chhungin natna a langchhuak thin a ni. State Vector Borne Disease Control Programme (SVB-DCP)-a thawktute chuan Dengue hi a tirah uluk taka a natna lanchhuah dan ang zel enkawlna pek a nih chuan taksa chak pangngai-ah chuan a dam leh vat thei a. Enkawl mumal a nih loh chuan Dengue Haemorrhagic Fever (DHF)-ah a lut thei a. Dengue Haemorrhagic Fever (DHF) a lo nih tawh chuan enkawl dam a harsa tawh a, thihna hial a thlen thei niin an sawi.