Chanmari Veng-a ruang chhar vuiliam nghal a ni

Nimin zing khan Serchhip Chanmari Veng Nursing School panna kawngthlang ah ruang pakhat chhar niin Lalruatfela (21), Chanmari Veng tih finfiah a nih hnuah nimin khan vuiliam nghal a ni.

He ruang hi Lower Chanmari, Hriangtlang road tia hriat thin-a Rinmawia (L) te In bul kawngthlang lam ft. 30 velah hmuh niin he ruang hi a bul hnaia cheng naupang ten an hmuh a ni a, Serchhip Police te hriattir an nih hnuah a hmunah kalin enfiah ngai ang ang te an enfiah hnuah he ruang hi Lalruatfela (21) s/o Lalremsanga, Chanmari Veng nia hriat a ni a, Police ten a hmuna tihtur tul te an tihfel hnuah Serchhip Damdawi In-ah ruang hi lain Postmortem nghal a ni a, nimin vek khan Chanmari Thlanmual-ah phum nghal a ni.

Lalruatfela chhungte chuan Lalruatfela hian niminpiah, Pathianni tukthuan eikham khan a thiante nen leng turin an In hi a chhuahsan tih sawiin, hemi hnu hian a rawn let leh tawhlo tih an sawi. A ruang-ah hian hmuh theih maia hliam hmuh tur a awm loh thu Police te chuan sawiin, Postmortem result a chhuah hnuah chanchin chiang zawk erawh hriat theih a beiseiawm tih an sawi a. He thihna thleng chungchang chhui zui ngai te chhui zui hna an thawk nghal bawk a ni.