Pathianni-ah hri kai 541 hmuhchhuah belh an ni

Pathianni khan Mizoram-ah Sample 1744 enfiah niin heng atang hian COVID-19 hri kai 541 hmuhchhuah an ni a, hri kai hmuhchhuah hi tam lo mah se Sample enfiah zawng zawng atanga chhutin za zela 31.02 te chuan hri hi an kai a ni.

Pathianni khan ZMC-a RT-PCR Laboratory-ah Sample enfiah awm lovin Fluorescent Immunoassay (FIA) Test mi 12 atangin COVID-19 hri kai mi 12 hmuhchhuah an ni a, an vai hian Aizawl District-a Sample lak vek niin Aizawl khawpui chhung ami vek an ni bawk. District hrang hranga TrueNat Laboratory 11 zingah Mamit leh Khawzawl District-ah te Sample 141 enfiah ni bawkin hri kai mi 11 hmuh an ni a, an zinga mi 8 te chu Khawzawl District atanga hri kai hmuhchhuah te niin midang 3 te hi Mamit District atanga hri kai hmuh an ni thung.

Niminpiah khan Mizoram hmun hrang hrangah Rapid Antigen Test hmangin Sample 1591 enfiah a ni bawk a, heng atang hian hri kai mi 518 hmuhchhuah niin an zinga 396 te chu Aizawl District-a hri kai hmuh te an ni a, Bethlehem Vengthlang-ah hri kai mi 30 hmuh niin Vaiva-kawn-ah 23 hmuh an ni bawk a, heng bakah hian hri kai mi 10 leh a aia tam hmuhna Veng 10 awmin midang zawng hi Veng leh khua 57 ami te an ni bawk. Heng bakah hian Mamit District-ah hri kai mi 66 hmuh leh niin Luimawi-ah hri kai 28 lai hmuh an ni a, Lunglei District-ah hri kai mi 23 hmuh niin Lawngtlai District-ah 17, Serchhip District-ah 12, Kolasib District-ah 3 leh Hnahthial District-ah hri kai mipakhat hmuh an ni bawk.

Mizoram-a COVID-19 hri kai enkawl te zingah nimin khan mi 313 te chu hri lakah fihlimin anmahni enkawlna hmun atangin chhuahtir an ni a, heti hian nimin tlai dar 5:00 thlenga Mizoram-a hri kai hmuh tawh chu 71,381 niin heng zinga 59,060 te chu enkawl dam an ni tawh a, hei hi hri kai hmuhchhuah atanga chhutin za zela 82.74 niin tunah hian hri kai enkawllai 12,080 an la awm mek a ni.

Mizoram-a COVID-19 hri kai enkawl zingah nimin khan mi 4 lai an boral leh a, nimin zing dar 3:15 khan H. Vanlalhluna (57), Zokhawthar chu ZMC-ah boralin hemi hnu nimin zing dar 5:00 khan C. Lallianmawia (78), Thuampui Aizawl chu ZMC-ah boral ve lehin nimin chawhma dar 10:50 khan Thangkimi (79), Bethlehem Vengthlang chu a boral ve leh a, nimin chhun dar 12:15 khan H. Tintlunga (67), Chandmary Lawngtlai chu COVID-19 vangin a boral ve leh bawk a. Heti hian nimin tlai dar 5:00 thleng khan Mizoram-a hri kai zingah mi 241 te chu an boral tawh a ni. Heti hian nimin tlai dar 5:00 thleng khan Mizoram-a hri kai zingah mi 241 te chu an boral tawh a ni. Heti hian tun thla ah ni 13 kan hmanral tawh chhungin nitin COVID-19 hri kai zingah boral an la awm ziah a, tun thla bikah hian mi 24 lai an boral tawh a ni.