Latest News

Health Minister in Mizo kutchhuak, Zopharm Hand Sanitizer leh Disinfectant te a tlangzarh

Mizo kutchhuak ZoPharm Hand Sanitizer leh Disinfectant te chu nimin khan Health Minister Dr. R. Lalthangliana chuan a Pisa-ah a tlangzarh.

ZoPharm Hand Sanitizer leh Disinfectant tlangzarhna hunah hian Health Minister Dr. R. Lalthangliana chuan COVID-19 hripui lengin Mizoram min nuai nasat lai taka ZoPharm ten anmahni kutchhuak liau liau mipuite hman theih tura an rawn chhawpchhuak chu a lawmawm takzet tih sawiin, Pathian in finna leh remhriatna a pek hmang tangkaia, sawrkar hna hmuhna atan ringawt hman tum lova, an thiamna te a nihna tur ang taka hmanga, mahni ke a dinchhuahpui an tum chu entawntlak a tih thu leh midangte chochhuaktu nise a duh thu a sawi a, kawng hrang hranga talent nei tha tak tak Mizo thalaiten an thiamna zawn theuhah theihtawp an chhuah chuan an hlawhtling thei a ni tih tarlangtu ni turin duhsakna a hlan a ni.

ZoPharm Managing Director Lalrinsangi Sailo, M Pharm (Biotechnology) chuan ZoPharm chu July, 2021, Covid-19 hrilengin khawvel pumpui a tihbuai laia hrileng lo doletna hmanrua pawimawh tak tak, Hand Sanitizer leh Disinfectant lo siamchhuak ve tura din a nih thu a sawi a. Food and Drug Administration lamin Mizoram-a Hand Sanitizer tha lo an han hmuhchhuah tak nualah chuan Hand Sanitizer rintlak, man man taka Mizo mipuite lei theih tura phochhuah chu ZoPharm tum ber a ni tih a sawi a. ZopPharm dintute hi Mizo hmeichhe Pharmacist rual niin, Lalrinsangi Sailo, M Pharm (Biotechnology) chu Managing Director a ni a. Technical Consultant-ah PC. Lalawmpuii, MS Pharm, PhD niin Consultant dangte chu R. Lalawmpuii, MS Pharm, PhD leh K. Thanzami, MS Pharm PhD te an ni.

ZoPharm hi Mizoram-a Hand Sanitizer leh Disinfectant siam phalna, Manufacturing License, Food and Drug Administration (FDA), Govt. of Mizoram-in Drug and Cosmetic Act, 1940 hnuaia a pek hmasak ber a ni a. Tunah hian WHO Formula-1 Hand Sanitizer size hrang hrang, 50 ml, 500 ml, 1 litre leh 5 litre te an siamchhuah bakah Disinfectant chi hnih, Sodium Hypochlorite USP (5% w/v) leh Hydrogen Peroxide (5 % w/v), 5 litre leh 1 litre-a pack ve ve an nei tel bawk a. Hand sanitizer pawh WHO duhdan ang thlapin 80% alcohol an hmang a. Zopharm thil siamchhuah te hi State pawn atanga lo kal nen an man a inang reng a, chutihrualin State pawn atanga lo kal tam tak aia rintlak tura ngaih an ni a. An product siamna atana chakkhai (raw materials) laknaah an duhtuiin Certificate of Analysis pe thei lo chu an dawr loh bakah anmahni in an lo test leh thlap a, an thil siamchhuah te pawhin Test an paltlang leh thin a ni.

Comments

Chhiar Hlawhte