Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

ZPM Leader in an welcome vek tih sawi

ZPM Leader Lalduhoma chuan Party pahnih ten kan ram an kaihhruai tawh dana lungawi tawklo leh a aia tha beiseitu zawng zawng chu ZPM-ah an lo welcome vek tih a sawi.

ZPM Party in Aizawl-a an Party Conference Hall-a mithar lawmluhna hun nimin-a an buatsaih ah he thu hi sawiin ZPM Leader chuan, “Kum 35 chhung State kan nih hnuah party pahnihin kan ram an kaihruai a, he party pahnihin kan ram an kaihhruai dan-a lungawi tawk lo te leh a aia tha beiseitu zawng zawng chu ZPM-ah kan lo welcome vek a ni,” a ti.

ZPM chu Kalphung thar a kal an ni tih pawh sawiin ZPM Leader chuan, “Party-a rinawmte hi kan in zirtir ve bawk nain, chu ai maha kan ngaih pawimawh chu policy-a rinawm a ni. Ram hluiah chuan Party-a rinawm an in zirtir a, Policy a rinawm an in zirtir ngai lova, Manifesto an han siam a, an han sawrkar a, mahse mipui leh Pathian hmaa an intiam ang kalh-a awm chang a awm a, kum 10 a zawn a an sawrkar chhung pawhin an thutiam-ah an ding thin lova, Policy a rinawm an inzirtir miau loh avang leh party a rinawm an in zirtir tlat avangin an pu te an kalsual hnuah pawhin an zui tlat thin a ni,” a ti a. “Hei hi kan ram natna benvawn a ni. Kan zui te an pawimawh a, an kalsual tawh erawh chuan zui zel kan ba tawh lo. Kan zui zel avang hian ro an rel leh thin a, kan ning leh thin a ni,” a ti bawk.

ZPM Leader chuan ZPM in Policy an duan mek thu leh Research Based a kal an tum thu sawiin, “Kan hmalakna tur hi a bul atanga a tawp hre sa a kal kan tum a, mithiam rual te nen kan buaipui mek a. ZPM hian policy bu hnih nei turin kan inruahman a, pakhat zawk chu sei vak lo a ni ang a, pakhat zawk chu chipchiar tak, Department tin kalpui kan tum dan, Road Map engkim awm sa kan siam dawn a, a kawl tur chinin an kawl ang a, chumi mil chuan budget siam niin, Department tin an kal dawn a ni,” a ti a, an sawrkar hma atang hian sawrkar tuk atanga che phat thei turin, Department tin kalpui dan tur an buaipui mek tih a sawi bawk.

Party inrelbawl dan chungchang pawh sawiin Lalduhoma chuan, “Kan party that zawkna turin kan in singsa thin a. Hei hi ngun taka kan hruaituten an ngaihtuah a, kan that zawkna tur nia an hriata an ruahman a ni. Hemi chungchangah hian party dang hman tur a nih loh avangin kan rawn ngai lem lova. Party dang hian min lo buaipui hle mai thin a, party dang tihbuai hi kan tum reng reng lova, an lo buai phah a nih chuan a pawi kan ti khawp a ni,” a ti bawk.

Nimin-a ZPM in an party-a an lawmluh zingah hian PRISM-a hruaitu ni thin leh MPC nen an inzawm hnua PC Party-a tel SL. Ngursailova Sailo te, RL.Liantluanga te, Laltanpuia leh H. Vanlalrova te bakah F. Zothansanga (Tuarpuii) te an tel a ni.

Comments

Chhiar Hlawhte